Cañete nalipay CHED chairman ni-resign
Gipadayag ni Dr. Paulus Mariae Cañete ngadto sa media ang iyang kalipay nga niluwat sa katungdanan isip chairman sa Commission on Higher Education si Patricia Licuanan kinsa iyang gihulagway nga nigukod sa operasyon sa Mandaue City College dihang wala na kini ilha sa kagamhanan sa dakbayan ug nag-operate na lang isip pribadong kolehiyo. Joy G. Torrejos
CEBU, Philippines — Gikalipay sa pangulo sa Mandaue City College, Dr. Paulus Mariae Cañete, ang pagluwat sa katungdanan sa chairman sa Commission on Higher Education nga si Patricia Licuanan.
Matud ni Cañete nga si Licuanan ang usa sa nigukod sa MCC imbis nga tabangan ang susama nila nga nagpadagan og lokal nga mga kolehiyo.
“I challenge the new chairman to be more developmental to help, not to close the school,” matud ni Cañete.
Masaligon si Cañete nga ang bag-ong chairman nga itudlo ni Presidente Rodrigo Duterte makatabang sa pagpalambo sa mga lokal nga kolehiyo sanglit mao kini ang tumong sa iyang administrasyon nga palambuon ang mga tunghaan.
Matud ni Cañete nga ang problema nga giatubang sa MCC ang wala gyud nasulbad tungod ni Licuanan.
Ang CHED unang nipasirado sa MCC niadtong Disyembre 3, 2010 apan wala kini gituman ni Cañete hinungdan nga gipaabot ngadto sa korte ang kaso.
Niadtong Hulyo 19, 2012 ang Quezon City Regional Trial Court Branch 76 niluwat og writ of preliminary injunction ug gimanduan ang CHED sa dili pagpatuman sa closure order batok sa MCC.
Nakita sa korte nga walay sayop ang pag-operate sa MCC subay sa ordinansa sa kagamhanan sa Dakbayan sa Mandaue nga gipasar niadtong Nobiyembre 7, 2005 sa panahon ni kanhi mayor, anhing Thadeo Ouano.
Nagpadayon hangtud karon sa ilang operasyon ang MCC nga gidumala ni Cañete isip pribadong kolehiyo dihang wala sila ilha ni kanhi mayor ug karon Kongresista Jonas Cortes.
Ang lokal nga kagamhanan sa siyudad ubos ni Cortes ang nagpadagan og laing MCC. (BANAT NEWS)
- Latest
