TCC wala nay internship uniform

CEBU, Philippines — Gipahibawo sa presidente sa Talisay City College (TCC) nga dili na sila magpatahi og uniporme karong tuiga alang sa mga tinun-an nga mag-internship.

Kini human nakontrobersiyal ang ilang pagpatahi sa niaging tuig diin hangtud karon wala pa gyud makompleto ang mga uniporme sa mananahi.

Si Ritchel Bacaltos, presidente sa TCC, nagkanayon nga nagpasukod ang 380 ka tinun-an apan pipila lang ang nakahatag sa bayad hinungdan sa pagkalangay sa paghuman sa mga uniporme.

Nahitabo pa nga ang nakabayad nga estudyante ang nipaabot sa iyang reklamo ngadto sa mga tigbalita nga daw hapit na lang matapos ang tingklase apan hangtud karon wala pa gyud nila magamit ang ilang gihandum nga uniporme.

Hinuon si Bacaltos niingon nga ang unang set sa uniporme ang nahatag na ug ang kuwang mao na lang ang ikaduhang set nga gipaningkamutan nga mahuman tanan sa dili pa matapos ang buwan sa Enero.

“Naleksyon na gyud mi mao na nga sa sunod dili na magpatahi og practicum uniform kay ang sul-obon mao na lang ang ilang naandan nga uniporme,” matud ni Bacaltos.

Giawhag ni Bacaltos ang mga tinun-an nga ila sab husayon ang ilang bayronon aron dili mahasol unya sa pagkuha sa ilang mga papeles sa TCC.

Siya nagkanayon nga bayran gyud sa mga tinun-an ang ilang uniporme ug gamiton kini hangtud nga matapos ang tuig sa tingklase. (BANAT NEWS)