Daghang naninda sa Sinulog gibadlong
Daw sa namawi ang mga manindahay sa ilang pagladlad sa ilang tinda sa dalan atubangan sa Basilica Minore del Santo Niño human kapin sa usa ka semana sila nga gidid-an sa lugar nunot sa mga kalihukan sa Fiesta Señor. May B. Miasco
CEBU, Philippines — Bisan sa mga pahimangno sa Division for the Welfare of the Urban Poor (DWUP) sa mga manindahay atol sa Sinulog grand parade, duna gihapoy wala nituman sa mga lagda.
Nagkanayon ang operations head sa DWUP, Genevieve Alcoseba, nga nakasugat gyud sila og problema sa mga manindahay ug gani duna sila’y gipangsakmit nga mga tinda.
Dunay mga manindahay atbang sa usa ka tunghaan sa Osmeña Boulevard nga gipagawas sa taga DWUP tungod kay ang gibaligya nga soft drinks mao ang binotelya nga gi-stock sa may sidewalk.
Laing kalapasan nga nakita sa DWUP mao nga hugaw kaayo ang dapit, dagko ug daghang lamesa, gihimong banggera ang Osmeña Boulevard ug naggamit og tent sanglit pagkaon ang ilang baligya.
Sigun ni Alcoseba nga wala niya gipaundang sa pagbaligya ang mga manindahay apan gipatarong ang mga lamesa tungod kay naa na man sa karsada.
Pabayron sa DWUP ang mga manindahay tungod sa kalapasan sa basura ug kahugaw.
“Napuno ko nila kay wala ko nagkuwang og orientation ana nga group of vendors, ako pa jud na sila gitabangan didto ni Sir Bimbo nga makatinda sila. So we have to implement political will. Wala’y luoyay kay wala ta nagkuwang pahimangno,” matud ni Alcoseba.
Duna say mga namaligya og mga cellphones nga wala’y resibo nga giundang sa DWUP tungod kay kalapasan gihapon kini sanglit gisultihan sila nga kun mamaligya og units dunay official receipt o kaha deed of sale sa mga second hand units.
Gipangbadlong sab sa taga DWUP ang mga henna tattoo tungod kay wala’y permit ug gibalhin sila og laing lugar. (BANAT NEWS)
- Latest
