Kapitolyo mopahalipay sa mga nakadaog

CEBU, Philippines — Gawas sa premyo nga nakuha gikan sa daog sa Sinulog, gipaabot nga adunay madawat nga pahalipay ang mga contingents nga nakadaog sa Sinulog Grand Parade gikan sa Kapitolyo.

Si Gob. Hilario Davide III nipadangat sa iyang kalipay sa pagdaog sa mga contingents sa kalungsoran sama sa Daanbantayan ug Carcar.

Ang Tribu Kandaya ug Carcar City Division nisungkit sa ritual showdown sa free interpretation ug Sinulog based category niadtong Domingo.

Si Mayor Nicepuro Apura sa dakbayan sa Carcar nagkanayon nga ila gyud gipaninguha nga makadaog karong tuiga sanglit pila na man usab sila ka tuig nag-apilan og Sinulog.

Samtang si Mayor Vicente Loot sa Daanbantayan nibutyag nga adunay imbitasyon kanila nga moapil sa Aliwan Festival didto sa kaulohan apan ila pa kining estoryahan sanglit manginahanglan na sad kini og laing pundo.

Ang duha ka mayor pareho kining nitug-an nga ang pundo alang sa ilang contingent maoy usa sa hagit sa ilang pag-apil sa Sinulog.

Samtang ang artistic director sa Tribu Buyoganon sa Abuyog Leyte nga si Victor Cuenco nagkanayon nga nalipay siya nga gihangop gihapon sa mga Sugboanon ang ilang konsepto kalabot sa mga buyog.

Matud ni Cuenco gusto nila ipakita ang global warming ug climate change ug unsay epekto niini sa kinaiyahan ug sa mga buhing mananap o hayop sama sa buyog.

Ang Abuyog nahimong kampiyon sa street dancing sa Sinulog sa duha ka tuig nga pag-apil nila sukad atong 2016 ug karong  tuiga.

Sa sunod nga Sinulog tinguha nila nga masungkit na usab ang maong titulo aron makuha ang ikatulo nilang kampiyonato.

Matud ni Cuenco nga anaa sa  upat ngadto sa lima ka milyones ka pesos ang nagasto sa ilang pag-apil karong tuiga. Ang Abuyog adunay 100 ka dancers, 50 ka instrumentalist ug 300 ka propsmen. (BANAT NEWS)