Daghang establisamento wala motuman sa EO

CEBU, Philippines — Adunay mga establisamento duol sa Sinulog route ang posibleng mag-atubang og silot tungod sa wala pagsunod sa executive order ni Mayor Tomas Osmeña alang sa kalinaw ug hapsay nga Sinulog sa miaging Domingo.

Sigon ni Konsehal Dave Tumulak, chairman sa Committee on Public Order and Safety ug Executive Committee Chairman sa Sinulog 2018 nga 25 porsiyento sa mga establisamento duol sa rota ang wala nituman sa EO.

Ang konsehal miasoy kadtong tanan nga wala nituman nakuhaan og video, picture ug affidavit sa mga pulis nga miresponde sa lugar ug ilaha kining i-endorsar kang Cebu City Mayor Tomas Osmeña.

“It’s up to the Mayor ipakita namo niya ang video, ang picture oras kanus-a nga namaligya plus kining mga gisugo nato atong gipapalit so naay insaktong ebidensiya mga business establishments within 300-meter radius nga nag-serve gihapon og beer mga liquor sa ilahang mga establishment,” sigon pa ni Tumulak.

Wala ibutyag ni Tumulak ang mga pangalan sa mga establisamento.

Gihulagway sa konsehal nga dako kaayo og natabang ang pagpatuman sa liquor ban sanglit sayo naabli ang dalan, sayo nakapanglimpyo, sayo nakapauli ug luwas ang mga tawo nga nanan-aw sa Sinulog.

Nunot niini, posible nga mao na gyud kini unya ang palisiya sa siyudad kada adunay Sinulog. Giangkon ni Tumulak bisan og duha ka buwan sila nangandam sa Sinulog apan duna lang gihapoy mga ginagmay nga lapso sama niining security.

Nakita sa konsehal daghang angay usbon sa Sinulog sunod tuig sama sa pagdugang og security, ang programa sa Sinulog festivities iapil na ang mga private sectors, mga malls ug traffic.

Samtang si Cebu City Mayor Tomas Osmeña nagpasalamat ilabi na sa mga volunteers ug sa mga tawo ug uban nga grabe ang sakripisyo aron magmalampuson ang Sinulog 2018. (BANAT NEWS)