53-anyos nga ginang sikop sa buy-bust

CEBU, Philippines — Dul-an usa ka milyon nga balor sa shabu ang nakuha gikan sa usa ka 53 anyos nga babaye nga nadakpan sa buy- bust operation sa dalan Magallanes ning dakbayan sa Sugbo.

Ang dinakpan giila nga si Kim Gonzales, residente sa Sitio Avocado, Barangay Labangon, ning dakbayan.

Nakuha gikan kaniya ang usa ka medium ug duha ka dagkong mga pakete sa gituohang shabu nga motimbang og 75 gramos kun basehan sa Dangerous Drug Board Value, sumala pa sa hepe sa Mandaue Police Station 5 nga si Police Senior Insp. Wilbert Parilla kinsa maoy naghimo sa operasyon mokabat na kini og P862,500.

Asoy pa ni Parilla sa Banat News migawas ang pangalan ni Gonzales human gitug-an sa usa nila ka dinakpan niadtong miaging adlaw. “Wala ni siya (Gonzales) sa among watchlist. Naa ra mi nakuha before unya nakasulti nga siya (si Gonzales) ang mohatag niya,” si Parilla miingon.

Nunot niini, ila kining gipaimbestigahan sa ilang mga asset ug tuod man nasubay nga anaa diay kini sa Dakbayan sa Sugbo nanukad.

Matud pa nga niadto pang Domingo sa gabii ang transaksyon ug didto unta sa Dakbayan sa Mandaue apan gikanselar ni Gonzales tungod sa pagbunok sa ulan.

Apan kagahapon nahinayon ang transaksyon nga didto kini himuon sa dalan Magallanes. Tungod niini, nakig-alayon sila sa Carbon Police Station nga miresulta pagkasikop kaniya.

Samtang usa ka high value target nga durugista ang nasikop sa kapulisan sa Dakbayan sa Talisay didto sa Sitio Kilawan, Barangay Tanke apan ang mga silingan ug mga paryente sa suspek ang nilaban ug nisuway pa og babag sa mga operatiba.

Si SPO3 Yvonne Ilustrisimo sa Talisay City Police Station niila sa dinakpan nga si Romeo Dabasol alyas Miyok, 50, nga dugay na nilang gipanid-an apan pirme silang maikyasan niini.

Nakuhaan og 22 ka gagmay nga paketeng shabu ug P600 nga kwarta si Dabasol. Sa dihang dad-on na kini sa mga polis niaksyon og babag ang mga kaliwat niini ug maayo na lang nga nipatuo sila sa barangay konsehal nga kuyog sa kapulisan. (BANAT NEWS)