Kapin 100 nadakpan sa illegal parking

CEBU, Philippines — Pasakaan og kaso sa kalapasan sa ordinansa kadtong mga tag-iya og sakyanan nga naisyuhan og citation ticket gumikan sa illegal parking atol sa gipahigayon nga Life Dance Festival sa Dakbayan sa Mandaue niadtong Biyernes sa gabii.

Si Glenn Antigua, pangulo sa Traffic Enforcement Agency of Mandaue (TEAM), niingon nga human mapasaka ang kaso maoy ilang himoon ang pagkuha og warrant of arrest kung ang tag-iya sa nadakpan nga sakyanan dili lang magpakabana sa obligasyon.

Matud ni Antigua nga kapin sa 100 gyud ka sakyanan ang ilang nadakpan sa illegal parking nga ang mga tag-iya niini nitambong sa Life Dance Festival nga gipahigayon sa bakanteng luna sa reclamation area duol sa Parkmall.

Ang mga traffic enforcers ug mga sakop sa Mandaue City Police Office (MCPO) ang nagtinabangay sa pagpatuman sa kahapsay sa maong lugar atol sa maong kalingawan.

Gipangsakmit sa mga polis ang mga botelya sa ilimnong makahubog dihang ilang nasigpatan nga pipila sa nitambong sa kalingawan ang nag-inom na sa daplin sa dalan sa maong lugar.

Si Antigua niingon nga ilang gipangbadlong ang mga tag-iya og mga sakyanan nga nag-atbang na sa pag-parking sa daplin sa dalan nga naglibot sa dapit nga gipahigayunan sa kalingawan.

Ang mga nagpasiugda sa maong kalingawan ang gihatagan og permit sa kagamhanan sa Dakbayan sa Mandaue human usab kini nakakompleto sa mga gilatid nga mga rekisitos.

Matud ni Antigua nga ubos sa ordinansa nga gipatuman sa kagamhanan sa dakbayan, ang mga tag-iya og sakyanan nga nakahimo sa maong kalapasan ang makabayad og multa nga P1,000 ngadto sa buhatan sa tresurero. (BANAT NEWS)