Namatay nadugangan og duha

CEBU, Philippines — Namatay ang duha sa tulo ka kritikal nga mga pasahero sa nadisgrasyang van sa Barangay Legaspi, Alegria kagahapon.

Unang namatay ang pito sa napulo ka langyaw ug Pinoy nga mga medical practitioners dihang nibangga ang ilang giabangang van sa punoan sa kahoy niadtong Sabado sa hapon.

Ang mga nakalas giila nga sila si Aurora Gagni, Joseph Huang, Juvella Huang, Nunilo Rubio, Rey Pascual, Diana Pascual, ug Bernes Roxas.

Samtang ang gidala sa tambalanan sa Dakbayan sa Sugbo mao sila si Leonora Tsai, Alfred Tsai ug si Elinita Rubio kinsa mga kritikal ang kahimtang human sa aksidente.

Kagahapon, sumala pa ni PO2 Eric Bongabong sa Alegria Police Station nga nakadawat sila og impormasyon nga namatay na ang duha apan wala pa mahibaw-i kon si kinsa sa tulo ang namatay sanglit gikompirmar pa kini sa imbestigador.

Bugtong ang drayber ug tag-iya sa maong van nga si Gilbert dela Cruz, 44, taga Guiwanon, Lungsod sa Argao ang nakaluwas sa maong aksidente.

Matud pa nga nakatagpilaw ang drayber ug namat-an na lang niya nga nabangga na sila sa kahoy.

Si Bongabong nibutyag nga nakadawat sila og tawag gikan sa nagpailang kabanay sa usa sa mga nakalas kinsa niingon nga desidido sila mopasaka og kaso batok sa drayber kinsa gitanggong karon sa buhatan sa kapolisan sa Alegria.

Samtang niawhag ang pangulo sa Provincial Disaster Risk Reduction and Management Office sa mga drayber nga dili basta-basta mobiyahe kung wala’y pahuway.

Giangkon ni dela Cruz nga upat na siya ka adlaw nga nag-drive ug usa ra ka oras ang iyang tulog.

Si Baltazar Tribunalo, pangulo sa PDRRMO,  nagkanayon nga sa habig sa operator angay sab susihon ang mga sakyanan niini.

Si Tribunalo nagkanayon nga nakig-alayon na siya sa consul sa US Embassy ug giseguro kung unsay mando gikan sa embahada masunod labot sa patay’ng lawas sa mga biktima ug sa mga dokumento niini sama sa mga passports. (BANAT NEWS)