400 special permit na-isyu sa LTFRB
CEBU, Philippines — Nikabat sa 400 ka special permit ang na-isyu sa Land Transportation Franchising and Regulatory Board sugod niadtong Enero 20 hangtud kagahapon atol sa Fiesta Señor.
Matud ni LTFRB-7 Director Ahmed Cuizon nga nipagawas sila og special permit sa mga public utility vehicles aron paghakot sa mga tawo nga niapil sa solemn procession niadtong Sabado hangtud kagahapon.
Sumala pa ni Cuizon nga 230 ang ilang na-isyu sa amihanan gikan sa V. Sotto St. padulong ug gikan sa Lapu-Lapu City ug SM Consolacion diin regular ang pamasahe niini ug dugang P4.
Sa habagatan usa ka gatus ang giluwatan alang sa V. Rama Avenue ngadto na sa Tabunok ug padulong sa temporaryong SRP bus terminal, ug Compania Maritima paingon sa SRP sa plite nga P10.
Gitug-an ni Cuizon nga niluwat sila og permit sa 20 ka mini-buses gikan sa Compania Maritima padulong sa SRP temporary bus terminal.
Mapasalamaton si Cuizon sa nagkalainlaing pundok sa mga transport operators sa Sugbo ingon man sa mga traffic enforcers ug tagdumala sa Cebu North Bus Terminal ug Cebu South Bus Terminal. (BANAT NEWS)
- Latest
