Kamapaubsanon ipasagop sa kaparian

CEBU, Philippines — Nipahimangno si Cebu Archbishop Jose Palma sa kaparian ug mga relihiyuso sa pagpamaubsanon sa ilang pagserbisyo sa katawhan.

Kini atol sa Pontifical Mass sa kapistahan ni Señor Sto. Niño kagahapon sa alas 6 sa buntag sa Basilica Minore del Santo Niño.

Matud ni Palma nga nakadawat siya og pipila ka reklamo bahin sa kaparian nga dili malipayon sa ilang pastoral work ug garbuso hinungdan nga iyang gipahimangnuan sila nga magpakisama sa Señor Sto. Niño tungod kay wala sila’y ikapasigarbo ngadto sa Ginoo.

“We became priests, not because we are worthy, but because of God’s love. Despite our unworthiness, we were chosen by God,” matud ni Palma.

Awhag sab ni Palma sa kaparian nga mahimong susama ni anhing Obispo Teofilo Camomot nga adunay dedication sa iyang trabaho bisan lagyo ang mga lugar.

“As we process his cause for sainthood, we must also try to follow his example. He is there to serve as our model,” matud ni Palma.

Hangyo ni Palma sa mga deboto nga iampo sab ang mga alagad sa Ginoo nga ilang matuman ang ilang kaakohan nga gitahas ngadto kanila.

Dugang pa niya nga sa kasamtangan ang Archdiocese sa Sugbo maoy nahimong pinuy-anan sa 400 ka diocesan priests, 200 nga gikan sa nagkalainlain nga mga religious congregations ug kapin sa milyones ka mga lay Catholics nga sa kasamtangan kini maoy labing dakong pundok nga mga alagad sa Ginoo.

Nunot niini iyang gihagit ang tanang kaparian nga ang ilang kaugalingon mahimong magpaduol kanunay sa katawhan ug magpakita nga malipayon nga nagtuman sa ilang kaakohan.

“The world has known of so much pain and problems. A priest should always be joyful and grateful. Frowning must have no space in the ministry as there should be joy in service,” matud ni Palma. (BANAT NEWS)