Nagmingaw ang ubang lugar

CEBU, Philippines — Nagmingaw sa mga tawo ang mga kasikbit nga lugar sa Dakbayan sa Sugbo atol sa Sinulog kagahapon.

Sa Dakbayan sa Mandaue, matud ni Police Officer 1 Peter Martinez nga sayo pa sa kaadlawon ang mga molupyo gikan sa nagkadaiyang barangay ilang namatikdan nga puno-puno ang mga pribado ug pangpubliko nga mga sakyanan paingon sa Dakbayan sa Sugbo.

Ang uban nanambong sa Pontifical Mass sa pilgrim center sa Basilica Minore del Sto. Niño nga gidumala ni Archbishop Jose Palma sa alas 6 sa buntag.

Daghan sab ang nisayo paingon sa Dakbayan sa Sugbo alang sa pagtambong sa Sinulog Festival.

Matud ni Martinez nga nakita nila nga sayo pa sa buntag taas na kaayo ang linya sa mga pasahero sa mga terminal.

Apan bisan nagmingaw na ang mga lugar, ang kapolisan sa Lungsod sa Consolacion nakadakop og bag-ong gi-monitor nga pusher og shabu sa Barangay Pulpogan nga giila nga si John Villegas Bayoyos, 23, kinsa nakuhaan og tulo ka gagmay nga pakete sa shabu. (BANAT NEWS)