Tinukmoray sa R.R. Landon St.

CEBU, Philippines — Nagtinukmoray ug nagkainitay ang mga gasugat nga mga tawo padung sulod ug padung gawas sa eskina sa R.R. Landon St. ug  Osmeña Boulevard atol sa Sinulog Grand Parade kagahapon.

Ang maong talan-awon susama sa nahitabo sa miaging tuig ug sa kaparehas usab nga oras tungod kay anhang dapita gyud magdasok ang mga tawong gikan pa sa downtown Colon nga gustong moadto sa Fuente Osmeña Circle ug kadtong gikan didto mopadulhog sa Colon.

Daghan ang nangasuko ug giyawyawan ang mga nagpabantay nga mga polis gumikan kay  bisan giunsa nila paghangyo nga palabangon ang ubang tawo aron maluag-luag wala sila paminawa.

"Unsa mani inyoha! Paulion pa mi ninyo o dili!" mao ang mga siyagit sa mga tawo ilabi na sa mga inahan nga nagdala sa ilang mga gagmay pa nga mga anak.

Ang nahitabo kagahapon susama gihapon sa nahitabo sa miaging tuig ug sa nakalabay pa gyud nga tuig nga diin usa ka sakop sa media ang napugos pagkatkat ibabaw sa usa sa mga gi-park nga props aron paggiya sa mga tawo nga nagdinutdotay na ug nagkainitay tungod sa kahuot ug wala’y kagawsan samtang ang mga nagbantay nga mga polis wala maminaw sa hangyo.

Apan ang mga polis bisan pa sa hangyo sa mga inahan miinsister nga di patabukon ang mga tawo kay maalihan ang mga dagkong props sa contingents nga nag-ali sa dalan.

Sa pasado alas 6 sa gabii, nagkasugat na ang mga tawo nga mga bag-o pang abot ug ang mga gusto nang mamauli ug kasagaran gipangkapoy ug gigutom mao nga dihang adunay nakalusot sa pisi daw tubig nga nayabo ang duot sa mga tawo padung sa dalan ug wala na gyud makontrol sa mga polis.

Tungod sa nahitabo, daghan ang mga mireklamo kay nangaipit ug dunay mga batang nangalisang ug lugos makaginhawa. Hinuon tungod niadto naluag ang dapit ug luwas nga nakatabok ang mga tawo. (BANAT NEWS)