Unom ka dayong kawatan sikop sa mall

CEBU, Philippines — Nadakpan ang unom ka gitumbok nga kawatan kinsa dayo gikan sa Metro Manila human namiktima sulod sa usa ka mall sa Mabolo, Dakbayan sa Sugbo niadtong Huwebes sa gabii.

Ang mga dinakpan giila nga sila si Joy Rose Ababao, 24, ug Ailyn Biaco, 29, pulos taga Marikina City, samtang ang mga taga Quezon City mao sila si Ansary Mamailo, 45; Saidamen Unte, 34; Aries Cabahug, 23, ug Margie Silva, 39. Gi-rescue sab sa kapolisan ang duha ka kauban niining batang lalaki nga nag-edad og 15 ug 17-anyos.

Sigun sa bag-ong director sa Police Regional Office-7, Chief Supt. Robert Quenery, nga mga piyesta ang target sa maong grupo.

“This is an organized crime group. Dumadayo talaga to tuwing may fiesta. Ang next nga nila Bacolod. Aabot nga sila sa Panagbenga Festival (sa Baguio),” sumala pa sa maong opisyal.

Ang deputy chief sa Mabolo Police Station, Inspector Samson Go, niasoy nga ang modus sa grupo mao ang pag-alirong sa ilang biktima aron malipat.

Niadtong Huwebes sa gabii namalit sulod sa usa ka mall ang biktima nga si Glenn Borinaga, 45, taga Guadalupe, Dakbayan sa Sugbo.

Namatikdan sa biktima nga samtang namili siya og T-shirt alang sa Sinulog, gialirungan ug gipiit-piit siya og mga tawo.

Dihang iyang gikuot ang iyang pitaka sa iyang bag nga may sulod P30 mil, wala na kini.

“Namay-ungan man ni niya si Joy Rose (Ababao) mao to iyang gi-citizen’s arrest. (Unya giadto dayon niya sa estasyon),” matud ni Go.

Dihang didto na sa Mabolo Police Station si Ababao, giingong nakaplagan sa iyang posesyon ang usa ka medium nga pakete ug duha ka gagmay’ng mga pakete sa shabu.

Si Go niingon nga dihang nadakpan na si Ababao, nibutyag kini nga ang iyang kauban nga si Mamailo naghuwat niya sa maong mall hinungdan nga nagpahigayon ang kapolisan og entrapment operation.

Dihang nagmalampuson ang operasyon niini, nakuhaan sab kini og usa ka medium nga pakete ug tulo ka gagmay’ng pakete sa shabu.

Gitug-an sa duha ang pension house diin sila nag-check-in ug didto nadakpan ang uban pa nilang mga kauban ug didto napalgan ang nawalang kwarta sa biktima ingon man ang driver’s license sa posisyon ni Unte.

Nakuhaan sab ang mga suspek og pipila ka pakete sa shabu, mga gituohang peke nga ID, tiket sa eroplano balik sa Manila ug mga tiket sa Life Dance Party sa Dakbayan sa Mandaue.

Dili lang kasong pagpangawat ang ipasaka batok sa mga dinakpan apan madugangan kini og kasong paghupot og ilegal nga drugas.

Samtang higpit man ang pagbantay sa kapolisan sa Mandaue City Police Office sa pagbisita sa imahen sa Señor Sto. Niño ug Birhen sa Guadalupe apan duha ka babaye ang biktima sa pagpanguot sa ilang pitaka. (BANAT NEWS)