Lagon hanap makalingkod sa Tuburan

CEBU, Philippines — Hanap na nga makalingkod sa pwesto ang gideklarar sa korte nga mananaug sa niaging eleksiyon sa pagka-mayor sa Lungsod sa Tuburan nga si Daphne Lagon.

Ang Commission on Elections Second Division niluwat og writ of preliminary injunction sa petisyon nga giduso ni Mayor Democrito Diamante human napupos ang 60 ka adlaw nga temporary restraining order sa kamanduan sa Regional Trial Court.

Sila si Presiding Commissioner Al Parreño, Commissioners Arthur Lim ug Sherrif Abas sa kamanduan niadtong Enero 19, 2018 nimando kang Toledo City RTC Judge Hermes Montero sa paghunong na sa paghusay sa kaso nga gipasaka ni Lagon batok ni Diamante.

Ang abogado ni Diamante nga si Atty. Edgar Gica nipasabot nga bisan mosang-at pa og motion for reconsideration si Lagon dili kini makapugong sa maong kamanduan.

Matud ni Gica nga si Lagon giproklamar sa korte sa Dakbayan sa Toledo isip mayor apan ang lingkuranan sa maong pwesto gihukman sa Comelec nga iya ni Diamante.

Si Diamante nanawagan ilabi na sa mga tigpaluyo ni Lagon nga hunungon na ang away diha sa Facebook karon nga duna nay desisyon ang Comelec nga nagpabor kaniya.

Giklaro sa kamanduan sa Comelec Second Division nga magpabiling mayor si Diamante hangtud nga mahingpit ang desisyon sa petisyon sa mayor. (BANAT NEWS)