Kapin tunga sa milyong deboto ang nisalmot

CEBU, Philippines — Dili moubos 500 mil ka deboto ang nisalmot sa  Solemn Procession kagahapon sa hapon bisan pa man sa paglain sa panahon, sumala pa sa bag-ong Regional Director sa Police Regional Office-7 nga si Chief Supt. Robert Quenery.

Sumala pa ni Quenery alas 2:50 sa hapon kalit misugwak ang gidaghanon sa mga deboto nga nanguyog sa procession.

Gawas pa niana, aduna pay mga nagbagat-bagat nga baga gihapong duot sa mga deboto gikan sa nagkalain-laing direksyon nga gustong moapas sa prosisyon.

Si Sr. Supt. Julian Entoma, officer-in-charge sa Cebu City Police Office miingon nga nagmalinawon kini taliwa sa gidaghanon sa mga tawo.

Wa say nakitang negatibong epekto ang makadiyot nga pagpawong sa signal sa mga cell sites sa rota sa prosisyon ilabi na nga nipadala daan og advisories sa text ang mga telcos.

Apan nakasinati og gamay nga problema tungod sa daghang mga bata nga nabuwag sa ilang mga ginikanan tungod sa kadaghan sa mga tawo.

"Naay mga bata nga nangasaag pero na-reunited ra man sad sila pagkahuman," si Entoma miingon.

Mitambong sa Santos nga Misa sila si Archbishop John Du, sa Palo, Leyte ; sa bag-ong gitudlo ni Pope Francis nga Apostolic Nuncio to the Philippines Archbishop Gabriele Giordano Caccia; Archbishop Jose Palma ug mga kaparian sa Archdiocese of Cebu ug sa mga silingan nga diocese.

Sa homiliya ni Du, gipahimug-atan niini nga angay daygon ang Diyos ug pasalamatan tungod kay bisan sa hadla sa ulan nagkatigum gihapon ang mga deboto sa pilgrim center.

Gidasig ni Du ang mga deboto nga di maluya ug di mobahar ang pagsalig ug pagtuo ngadto sa Kahitas-an bisan sa daghang hulga sa katalagman ug kasakit.

Matud niya angay mag-ampo aron panalipdan sa mga katalagman ug lakip silang mga kaparian aron magpadayon silang makaserbisyo sa katawhan. (BANAT NEWS)