Pasil nagpista gihapon bisan sa sunog
CEBU, Philippines — Bisan sa katalagman nga miigo sa ilang barangay, wala’y usa ka semana sa wala pa ang Pista Senyor dihang gilamoy sa dakong sunog ang kapin 300 ka panimalay, ang mga residente sa Barangay Pasil, Cebu City wala kawad-i og paglaum.
Wala sila nagpalupig sa ilang sitwasyon nga anha pa sa mga evacuation centers nagpasilong kay desidido silang saulogon ang kapistahan sa ilang patron,ang Senyor Sto. Niño. Matud sa ilang kura paroko nga si Rev. Fr. Lamberto Paradiang Jr. nga sukad Oktubre pa sila nangandam alang sa ilang kapistahan maong bisan pa sa nahitabong sunog padayonon gihapon nila sa ilang mga aktibidades.
Gani atol sa street dancing nga aktibidad sa pista, nanggawas ang mga lumolupyo aron sa pag-apil sa hugyaw sa kadalanan.
Makita sa kadalanan sa Pasil ang kahugyaw diin napuno og banderitas ug mga tawo ug naglanog-lanog ang tukar sa Sinulog.
Ila kining gipasalamat tungod kay way kinabuhing nakalas sa ilang mga pamilya. Kon ang mga taga Pasil pa maoy pasultihon, wala maabo sa sunog ang ilang pagsalig ug pagtoo sa Senyor Sto. Niño human sa maong sunog.
Gani dihang nahitabo ang sunog, ang contingents sa Tribu Mahugyawon sa Pasil misayaw gihapon sa Sinulog sa Kabarangayan ug nakadaog sa ikatulong pwesto sa street dancing.
Nagpabilin nga positibo ang mga residente sa ilang pagpuyo ug giisip nila nga usa lang ka pagsuway ang maong sunog. (BANAT NEWS)
- Latest
