Pito patay sa bangga
Si Senior Police Officer 3 Eduard Villarte, imbestigador sa Alegria Police Station nga nahinabi sa Banat News di pa makahatag sa mga pangalan sa mga biktima atol ning pagsuwat sa balita. File
CEBU, Philippines — Pito ka mga turistang mga doctor ug nurses nga nagbase sa US ang nakutloan sa kinabuhi samtang tulo ang nalandig sa tambalanan human nasampak sa punoan sa kahoy ang gisakyan nilang van kagahapon diha sa Barangay Legaspi, Lungsod sa Alegria.
Si Senior Police Officer 3 Eduard Villarte, imbestigador sa Alegria Police Station nga nahinabi sa Banat News di pa makahatag sa mga pangalan sa mga biktima atol ning pagsuwat sa balita.
Matud pa ni Villarte, gikan sa Lungsod sa Oslob ang maong mga turista ug mopadulong unta kini sa Kawasan Falls sa dihang nakasugat og disgrasya.
Luwan sila og Toyota Grandia nga dunay plate number AED-1299 ug gimaneho ni Gilbert Dela Cruz, 44 anyos, taga Barangay Guiwanon, Lungsod sa Argao.
Matud pang Villarte ang drayber miangkon nga nakatagpilaw kini samtang nagmaneho maong nabangga sila sa punoan sa mahogany sa kilid sa dalan.
Sumala pa ni Villarte, dili pa nila mahatag ang mga pangalan sa mga biktima tungod kay padayon pa nila karon gisuta ang tinuod nga mga pangalan ilabi na sa mga nakalas.
Dugang pa ni Villarte, usa sa mga biktima ang nadala sa Malabuyoc Hospital, samtang ang uban didto gidala sa Reinhard Wirtgen Memorial Hospital sa Barangay Poblacion sa maong lungsod.
Gibutyag ni Villarte, ang maong mga turista, mopahigayon unta kini sila og medical mission sa Camiguin karong adlaw nga Lunes.
Ang driver gipatambalan karon human nakaangkon usab og kadaut sa kalawasan gikatakdang pasakaan og kaso nga reckless imprudence resulting to multiple homicide ug multiple serious physical injuries.
Gitug-an ni Villarte, anaa pa sa lugar ang sakyanan human kini grabeng nakaangkon og kadaut ang atubangang bahin niini. (BANAT NEWS)
- Latest
