Legal nga tabang ni VM Labella sa mga nasunogan

CEBU, Philippines — Magbutang si Cebu City Vice Mayor Edgardo Labella og legal assistance counter alang sa mga biktima sa sunog sa Barangay Pasil aron matabangan sa pag-recover sa ilang mga legal documents.

Kini human nabantayan sa bise mayor nga pipila sa mga residente sa maong barangay ang nawagtangan sa ilang mga legal documents sama sa marriage contract, certificates, titulo sa yuta ug uban pa.

"All documents and all other legal documents are all burned. This way they will be assisted, my office will put up a tent, ako na gisabot si Barangay Captain Guioguio," matud ni Labella.

Niadtong Domingo ang Sitio Lawis, Barangay Pasil naigo sa dakong sunog.

Sigun ni Labella nga nagsugod na siya sa pagpakig-alayon sa mga private lawyers nga andam motabang sa iyang tinguha.

Si Labella nipasalig nga ang ilang law office nga E.C Labella motabang sa mga apektadong residente mahitungod sa mga legal nga hisgutanan.

Ang legal assistance counter tinguha nga ibutang human unya sa Sinulog Grand Parade sanglit kinahanglan pa sab pahibaw-on ang katawhan.

Si Pasil Barangay Kapitan Julius Guioguio sa iyang bahin mapasalamaton sa lakang nga buhaton ni Labella.

“Actually, nitawag si Vice ana pag niaging adlaw, in favor kaayo mi ani kay dako kaayo ni matabang sa mga residente nga nasunog ilang lisensya, certificates sa mga bata ug uban pang importante nga dokumento nga walay bayad," matud ni Guioguio. (BANAT NEWS)