Uwan wa panumbalinga sa mga deboto

CEBU, Philippines — Bisan sa bati ang panahon apan wala kini panumbalinga sa mga deboto pagtambong sa gipahigayong Walk with Mary kagahapon sa kaadlawon nga matud pa sa kapolisan niabot ngadto sa 90 mil.

Matud ni Konsehal Dave Tumulak, ang pangulo sa Peace and Order sa Dakbayan ug Deputy Mayor on Police Maters nga nahinabi sa Banat News mas daghan ang nitambong kagahapon.

Ang Walk with Mary nanukad gikan sa Fuente Osmeña padulong sa Basilica Minore del Santo Niño.

Wala  say natala nga mga kakulian atol sa Walk with Mary bisan pa man sa bati nga panahon.

Usa ka deboto nga nagpaila lang sa pangalang Ricardo, 38-anyos taga Badian, nitug-an bisan sa pagbunok sa ulan wala kini nakapaluya kaniya.

Matud niya dili paigo kining sakripisyo sa kadaghan sa grasya nga iyang nadawat lakip ang gasa sa maayong panglawas ug ang maayo na nilang pagkabutang karon.

Si Cebu City Mayor Tomas Osmeña nakadayeg sa kahugot sa pagtuo ug debosyon sa mga Sugbuanon ngadto sa Balaang Bata ug sa Birhen sa Guadalupe.

Human sa Santos nga Misa gisunod dayon ang Traslacion diin gidala ang mga imahen ngadto sa National Shrine of Saint Joseph Parish sa dakbayan sa Mandaue.

Gikan sa basilica, ang rota sa Traslacion miagi sa D. Jakosalem Street, patuo sa General Maxilom Avenue, pawala sa Gorordo Avenue, patuo sa Archbishop Reyes/Governor Cuenco Avenue, patuo sa A.S. Fortuna Avenue nga utlanan sa Cebu City ug Mandaue City.

Makita sa dalan ang mga tawo nga nagpaabot nga moagi ang Traslacion.

Dunay mga tinun-an nga mihalad og sayaw ug ang uban miwara-wara sa Balaang bata ug uban pa.

Mao kini ang unang higayon nga si Osmeña mikuyog sa Traslacion.

“Daghan tawo, ako bilib gyud ko bisan naay uwan, pwerteng bagaa crowd oh. So far, so good, it only takes one incident to ruin the whole thing so we’re monitoring it very carefully, everyone is on full alert,” sigon ni Osmeña.

Samtang ang pangulo sa Cebu City Disaster Risk Reduction Management Office (CCDRRMO) Nagiel Bañacia miasoy nga hapsay ug malinawon ra ang Traslacion kagahapon.

Pag-abot sa Dakbayan sa Mandaue gisugat kini nila ni Mayor Luigi Quisumbing, Bise Mayor Carlo Fortuna ug uban pa nga mga opisyal sa kagamhanan.

Ang mga establisamento sa maong mga dalan nga gilabyan sa Traslacion gilumbayan usab og mga deboto nga nagbutang og ilang mga altar nga adunay imahen sa Senyor Sto. Niño.

Gisugat kini sa pagsayaw sa Sinulog sa mga tinun-an nga misalmot usab sa Panagtagbo Festival nga gipasiugdahan sa Taga Mandaue Inc.

Ang motorkada mipadulong sa A. del Rosario sa Barangay Guizo ug milahos sa Barangay Tipolo hangtod na ngadto sa Sotero B. Cabahug  Extension pasud sa National Shrine of  Saint Joseph sa Barangay Centro sa maong dakbayan.

Pag-abot didto gisugdan gilayon ang arrival mass nga gisundan usab sa vigil. Karong buntag dad-on ang duha ka imahen padung sa Lapu-Lapu City ug ihapit sa Birhen sa Regla Parish dayon himuon ang fluvial procession nga anha manukad sa Naval Forces Central pabalik sa Mandaue City dayon lahos na ngadto sa Cebu City balik sa basilica. (Decemay P. Padilla, Rowena Capistrano, Camille Pateres ug Romeo Limpangog) (BANAT NEWS)