Natagak sa atabay, patay

CEBU, Philippines — Usa ka trabahante ang namatay human kini natagak sa atabay sa sulod sa poultry farm nga iyang gitrabahoan diha sa Sitio Magay, barangay Balidbid lungsod sa Bantayan kagahapong adlawa.

Ang 53 anyos nga namatay giilang si Pedro Capus Albasite, trabahante sa JGR Poultry, residente sa Manan-aw sa barangay Bantigi sa maong lungsod.

Matud sa imbestigador nga si PO3 Lauro Laurel sa Santa Fe Police Station, ang manager sa giingong poultry ug si Albasite nagsabot nga padak-an ug palawman ang maong atabay nga adunay gilawmong 14 ka tiil.

Kauban ni Albasite sa pagpalawom sa atabay ang iyang anak. Matud pa gisuwayan pa unta niini pagsalbar ang amahan apan hasta kini diriyot malumos. Ang usa sa mga kauban ni Albasite nga nakabantay sa nahitabo daling miresponde kanila apan ang anak ra gyud ang iyang naluwas. Sa inisyal nga imbestigasyon ni Laurel, nakita nga walay saktong mga gamit alang sa luwas nga pagtrabaho sa ilawom sa maong atabay hinungdan sa iyang pagkatagak. (BANAT NEWS)