2 polis nakapusil sa nurse suportado

CEBU, Philippines — Suportado sa director sa Cebu Provincial Police Office (CPPO) ang mga polis nga nakapatay sa lalaking armado sulod sa kan-anan sa Gaisano Fiesta Mall sa Tabunok, Dakbayan sa Talisay niadtong niaging adlaw.

Si Senior Supt. Edgar Alan Okubo nibutyag nga andam sila mohatag og legal assistance nila ni PO1 Erwin Denila ug PO1 Ramonito Dinapo ilabi na kun makita gyud nga ang iyang sakop nitrabaho.

Kini human ilang nadungog nga modangop sa Commission on Human Rights (CHR) ang kabanay sa napatay sa polis nga si Michelle Jeff Cabañero Gabutan.

Ang uyoan nga si Kapitan Raul Cabañero sa Barangay Bulacao ug mao sab ang presidente sa Association of Barangay Councils (ABC) sa Siyudad sa Talisay nibutyag nga na-depress ang iyang pag-umangkon tungod kay gibiyaan kini sa iyang asawa.

Nisamot kini kay sa dihang nikaon sa Gaisano Fiesta Mall, dugay ang pag-serve sa pagkaon ug dili pa gyud mao ang iyang gi-order ang na-served.

Si Gabutan usa ka registered nurse nga nagtrabaho sa nasud sa Canada. Dili lang kini dugay naabot aron unta apason ang iyang pamilya nga tua sa Davao City.

Apan niadtong Lunes sa hapon nahitabo ang iyang pagsulong sa manager sa Mang Inasal ug nagpasalba. Naigo sa splinter ang manager sa kan-anan.

Sa iyang paggawas napusilan kini sa polis nga tayming sab nga nag-order og pagkaon niadtong tungora.

Si Okubo niingon nga ilang biyaan ang imbestigasyon sa CHR kun aduna ba’y kasaypanan ang mga polis labot sa ilang pagpusil ni Gabutan.

Ang Talisay City Police Station nihatag og pasidungog nila ni Denila ug Dinapo usa ka adlaw human nahitabo ang pagpamusil.

Apan sa iyang bahin si Okubo nitataw nga ila una kining gitun-an kun angay ba gyud sila nga mopasidungog sa duha ka polis. (GMR) (BANAT)