Tomas wa nahulga kang Labella
CEBU, Philippines — Wala nabalaka si Cebu City Mayor Tomas Osmeña sa pamahayag ni Bise Mayor Edgardo Labella nga andam na silang mag-atbang sa pagka-mayor sunod eleksiyon.
Si Osmeña niingon nga bisan kinsa mahimong modagan apan kini nitataw nga ang iyang kaatbang dili sila si Labella, Presidential Assistant for the Visayas Michael Dino ug kanhi mayor Michael Rama kun dili kadtong mga dagkong patigayon nga iyang nakontra.
Dili makatug-an si Osmeña kung si kinsa nilang Labella ug Rama ang mas lig-on niyang ikaatbang kung dili anaa ra sa mga Sugbuanon.
“If the Cebuanos vote for them, I will lose, if the Cebuanos will vote for me, I will win, period,” matud ni Osmeña.
Si Labella niluwat og pamahayag human siya nanumpa isip presidente sa Partido Demokratikong Pilipino-Lakas ng Bayan (PDP-Laban)-Cebu City Chapter sa buhatan ni House Speaker Pantaleon Alvarez sa niaging adlaw.
Apan gitataw sa bise mayor nga mag-agad siya sa hukom sa iyang grupo kun kinsa nila ni Rama ang moatbang kang Osmeña. Nasuta nga ang PDP-Laban Cebu City Chapter adunay coalition sa Barug Team Rama, ANAD Partylist ug Panaghiusa Partylist.
Si Rama niingon nga dili una kini gusto hisgutan ang pamahayag ni Labella kay matud pa tukion una kini sa ilang grupo. (GMR) (BANAT)
- Latest
