Motor i-ban sa SRP tunnel

CEBU, Philippines — Nagtinguha ang Cebu City Transportation Office (CCTO) nga dili na paagian og motorsiklo ang tunnel area sa South Road Properties aron malikayan ang disgrasya.

Sigun sa operations head sa CCTO, Francisco “Isko” Ouano, nga usa sa tinguha nila sa SRP tunnel mao ang pagpatuman sa speed limit ug pagbutang og speed gun sa dapit.

Matud ni Ouano nga dili mahimong idili ang pagpaagi sa mga dagkong sakyanan sa SRP tunnel kay gihimo kini alang sa maong katuyoan ug wala lang nila tugoti nga makaagi sa dapit ang mga tanker truck kay delikado sa disgrasya.

Ang pagdili sa mga motorsiklo sa SRP tunnel posibleng ipatuman human sa Sinulog.

Kun mapatuman kini ang mga motorsiklo mahimong adto moagi sa Compania Maritima paingon sa SRP o kaha sa viaduct lusot sa S. Osmeña.

Tinguha sa CCTO nga mopahigayon og public hearing alang sa ilang tinguha nga pagdili sa mga motorsiklo sa SRP.

“Peligro sad sa mga motorista ilabi na kanang mga gagmay’ng motor. Assuming katong gahapon nga nahitabo naay motor mahulog gyud ug mapisat in fact ang kato ganing auto Honda black pwerte ganing gubaa, how much more sa motorcycle, bahalag daghan og masuko nato ang importante atong gipanglantaw ang ilang seguridad,” sigun ni Ouano.

Duha ka unit sa speed gun ang gamiton sa mga traffic enforcers kini human nakita ni Mayor Tomas Osmeña nga epektibong kahimanan aron pagtubag sa vehicular accident sa SRP tunnel.

Samtang gipahibawo sab sa mayor nga sugod sunod buwan mas istriktuhon na ang pagpatuman sa lagda sa trapiko ug wala nay mahitabong husay o kaha diskwento.

Wala siya’y plano nga i-ban ang mga dagkong sakyanan sa SRP tunnel ug mas pilion niya nga i-ban ang mga gagmay nga sakyanan sanglit ang SRP gimugna alang sa industriya sa habagatan. (GMR)  (BANAT)