Naayo tungod sa Balaang Bata

CEBU, Philippines — Wala panumbalinga sa mga deboto ni Senyor Sto. Niño nga anaa sa Devotee City ang kakapoy ug kahago nga ilang nasinati sa pagpamaligya.

Kini tungod dili lang alang sa pinansyal nga aspeto kondili pagpakita sab sa ilang lig-on nga debosyon ngadto sa Senyor Sto. Niño.

Kapin duha ka libo nga mga tawo nga gibana-bana nga mopuyo sa Devotee City sa karon nga Sinulog.

Si Aldeng Gastador, 60 anyos, taga Pinamungajan, adunay laing rason kong ngano nagbalikbalik siya kauban sa iyang pamilya diri sa dakbayan matag Sinulog gawas sa pagpaninda.

Matud niya sukad pa sa iyang pagkadalaga nahimo na siyang deboto ni Senyor Sto. Niño siya miingon nga ang ilang debosyon nahimong mas lig-on sukad atong hapit maigo ang iyang anak og atop tungod kay gibalik sa iyang anak ang ilang imahen sa sud sa ilang balay niadtong panahon sa bagyong Yolanda.

Nagpasalamat usab siya nga naayo ang iyang anak sa iyang sakit sa baga.

Tungod niini, ang pagpamaligya og kalo, tubig ug uban pa ang ilang gibuhat aron lang aduna silay ikaplete ug pangkonsumo sa pag-anhi nila sa Sugbo matag Sinulog kay mao kini ang ilang panaad ngadto sa Balaang Bata. (IBM) (BANAT)