Gwardiya natagakan patay

CEBU, Philippines — Usa ka 29- anyos nga security guard ang namatay human matagaki og crane hook block sa tower crane nga gigamit sa usa ka construction site nga iyang gibantayan diha sa I.T. Park sa Barangay Apas ning dakbayan sa Sugbo niadtong Miyerkules sa gabii.

Ang biktima nga dead on the spot mao si Junrel Coraraton Tenebroso sakop sa Black Pearl Security Agency nga lumad taga Gunting lungsod sa Barili apan temporaryo nga nagpuyo sa Nivel Hills sa Lahug.

Matud sa kauban sa biktima nga si Felix Jimena naa sa sulod sa guard house si Tenebroso dihang natagakan kini sa crane hook block gikan sa rooftop sa building.

Si Demetrio Cornecio Jr., operator sa tower crane miingon nga samtang nag-operate siya niini, miungot ang kable sa crane ug kalit nga natagak ang crane hook block padung sa guard house.

Tungod sa kabug-at sa hook block namatay dayon ang biktima sumala pa sa mirespondeng si Fyll Lacaolacao sa Emergency Rescue Unit Foundation (ERUF).

Nagpadayon pa gihapon ang imbestigasyon sa kapolisan sa Crime Scene Unit Investigation (CSIU) ug sa Homicide Section sa Cebu City Police Office  kon pasakaan og kasong reckless imprudence ang crane operator ug mga kadagkoan sa maong construction site tungod sa pagpabaya. (IBM)  (BANAT)