Duha gipamusil, usa patay

CEBU, Philippines — Usa ka gidudahang nalambigit sa ilegal nga drugas ang gisundan ug gipusil sa duha ka wa pa mailhing mga lalaking nag-angkasay sa usa ka motor diha sa Sitio Guiwanon Brgy. Poblacion, Compostela niadtong Miyerkules sa hapon.

Ang biktima giila nga si Jefredo Bataluna ug residente sa Dakbayan sa Danao.

Sumala pa sa hepe sa Compostela Police Station nga si Senior Inspector Junafe Vergara diha ra sa iyang motorsiklo ang biktima dihang gipusil kini sa duha ka mga lalaki.

Naigo sa iyang lawas ang biktima apan nakaambak gihapon kini sa iyang motor ug nakadagan pasud sa mga kabalayan sa maong lugar ug wala na gukda pa sa mga mamumuno.

Ang mga tawo sa lugar daling mitabang ug midala kaniya sa tambalanan ug gikatakdang operahan karong adlawa.

Atol sa imbestigasyon sa kapolisan, si Vergara mitug-an sa Banat News nga sa dihang ilang gihiling ang mga gamit sa biktima aduna silay nakitang usa ka paketeng gidudahang shabu, cash ug cellphone nga diin adunay mga text messages nga nakig-transaksyon kini og drugas.

Nagduda ang kapolisan nga adunay kalabutan sa drugas ang pagpamusil kang Bataluna.

"Nag-coordinate na ta sa police station sa Danao kung drug personality ba ni didto basta diri sa Compostela kay wala mi record ana niya," si Vergara miingon.

Niining pagsuwat, gitug-an ni Vergara nga aduna na silay gitutokang mga persons of interest sa maong nabulilyasong pagpatay sa biktima.

Samtang patay na  pag-abot sa Eversely Sanitarium General Hospital  ang usa ka Dionisio Talisik, nga biktima sa pagpamusil sa Sitio East  Binabag, Barangay  Tayud, Lungsod sa Consolacion sa miaging gabii.

Si Senior Police Officer 4 Rosalinda Sardan sa Consolacion Police Station miingon nga si Talisik nagpuyo sa Sitio San Roque sa maong barangay.

Naabtan pa sa mga polis ang biktima  nga nagbuy-od sa dalan ug dali nilang gikarga sa ambulansiya sa lungsod ug gihatd ngadto sa tambalanan.

Matud pa ni Sardan nga usa ka Jerry  Monteller Martinez ang gitumbok nga suspetsado pagpusil sa biktima  kinsa  daling nakaikyas.

Wala pa matino ang hinungdan sa maong pagpamusil tungod kay way nakahatag kanila og dugang impormasyon. (IBM) (BANAT)