Gasto sa Talisay sa Sinulog nadugangan
CEBU, Philippines — Niabot na sa P7.1 milyones ang gahin sa kagamhanan sa Siyudad sa Talisay sa pagsalmot sa Sinulog karong tuiga.
Kini human ang Talisay City Central School ang mananaug sa Sinulog sa Kabataan sa Lalawigan ug lakip sila nga mopresentar sa Sinulog Grand Parade karong Domingo.
Unang budget nga gipagawas niabot lang sa P6.7 milyones apan paghuman sa Sinulog sa Kabataan sa Lalawigan nakadesider sila nga dugangan kini hinungdan nga niabot og P7.1 milyones.
Matud ni City Budget Officer Edgar Mabunay nga gipaayo nila ang mga props nga naguba human sa ilang presentasyon niadtong Sabado.
Iyang gipasabot nga ang dugang nga P500 mil alang kini sa pagkaon sa mga dancers ug sa mga supporting staff sugod kagahapon hangtud na sa Domingo.
Nagkanayon si Mabunay nga dako lang gyud ang gasto nila sa parada tungod kay tibuok adlaw man kini nga nagkinahanglan og pamahaw, paniudto ug panihapon ingon man mga snacks ug energy drinks sa mga dancers nga makalahutay hangtud sa pagkahuman sa ilang pagsayaw.
Ang Talisay City Central School nga may tema nga cacao nga gihimong tablea o tsokolate ang nahimong mananaug sa ritual showdown ug nakakuha sa best in costume, best in musicality ug ikaduha sa street dancing competition. (BANAT NEWS)
- Latest
