Talisay limpyohan sa illegal parking

CEBU, Philippines — Gipa-blotter sa taga Department of Public Works and Highways (DPWH) Second District Engineering Office ang pipila ka nanag-iya og sakyanan nga gi-parking daplin sa karsada kagahapon sa buntag.

Sila si Engr. Valrico Tomol, maintenance, planning ug paralegal sa DPWH Second DEO ug si Engr. Christian Bernido maoy nangunay sa pagtala sa mga pangalan sa mga tag-iya sa sakyanan nga pataka lang og parking.

Matud pa ni Tomol nga pasiuna lang kini nilang pagpahibawo nga gidili gyud ang mga sakyanan daplin sa karsada ilabi na ang mga illegal structures sama sa carwash, vulcanizing ug canopies. Ilang ipatawag ang mga pangalan nga na-blotter sa polis aron sila mahibawo sa ilang kasaypanan apan sa umaabot nga adlaw mo-isyu na sila og temporary operator’s permit (TOP).

Dugang pa niya nga mag-usa na unya sila sa kapolisan, City of Talisay-Traffic Operation Development Authority ug ubang ahensiya sa paghimo og operasyon. (BANAT NEWS)