Tinda way permit sakmiton

CEBU, Philippines — Sugod kagabii nipahigayon na pagpangsakmit ang Prevention Restoration Orderly Beautification Enhancement (PROBE) Team sa mga tinda nga walay permit gikan sa Division for the Welfare of the Urban Poor.

Matud sa hepe sa PROBE, Raquel Bohol-Arce, nga nipahigayon sila sa pagpahibalo sa pagsugod pa lang sa nobenaryo nga dili maninda sa mga lugar nga wala gitugot ug kinahanglan nga narehistro sila sa pagpaninda.

Sumala pa ni Arce nga aduna silay team nga mag-monitor sa mga lugar nga walay gitugot nga maninda aron paghatag og kasayon sa pag-agi sa mga tawo ilabi na duol sa simbahan sa Basilica Minore del Sto. Niño ug sa mga rota sa procession ug sa Sinulog grand parade.

Dugang pa ni Arce nga sa ilang mga masakmit nga tinda, adto na kini malukat human sa Fiesta Senyor.

Awhag ni Arce sa tanang mga manindahay nga sundon lang ang lagda aron dili sila masakmitan og tinda.

Gisugdan na kagahapon sa hapon ang pagpanghatag sa mga temporary approval, vendor’s identification card (ID), ug official receipt (OR) sa Barangay San Roque Gym alang sa mga maninda karong Sinulog.

Makuha na sa tanan nga nagparehistro ang ilang ID, temporary approval ug OR karong adlawa hangtud ugma.

Matud ni DWUP operation head Genevieve Alcoseba nga nalangan sila sa paghatag sa ID tungod kay nagkaproblema sila sa pagprinta niini.

Ang temporary approval dili balido kung walay OR nga ikapresentar ang mamaligyaay.

Adunay tres mil ka vendors ang hatagan sa Sinulog Vendor’s ID kinsa 2,794 niini ang nagparehistro gyud nga vendors ug 206 niini kay ang mga mamaligyaay og bottled waters.

Matud ni Alcoseba nga bisan dili na kinahanglan sa mga water vendors ang permit kinahanglan gihapon nilang magtaud og ID.

Nalatid sa ID card ang mga gidili sa mga tindahan ug lainlain ang kolor aron mahibaw-an kung asa lang sila pwede makapaninda.

Dugang ni Alcoseba nga sakmiton gihapon nila ang mga tinda nga gidili bisan kung aduna pay permit ug labaw na ang mga manindahay nga walay permit.

Ilang nabantayan sa niaging tuig nga nagkalandrakas ang mga manindahay nga nakababag na sa agianan sa mga tawo.

Hangyo ni Alcoseba sa mga vendors nga mosunod sa mga lagda ug regulasyon aron malinawon ug mahan-ay ang ilang pagpamaligya ug ang pagsaulog sa kapistahan ug sa Sinulog. (BANAT NEWS)