Labella andam na molansar pagka mayor

CEBU, Philippines — Gibutyag ni Bise Mayor Edgardo Labella nga andam na siyang modagan pagka mayor sa dakbayan sa Sugbo kon mahinayon ang eleksiyon karong sunod tuig, ug hayan magkaatbang sila si Mayor Tomas Osmeña kon magpapili man kini pag-usab.

Ang pamahayag ni Labella iyang gihimo human siya nanumpa nga presidente sa Partido ng Demokratikong Pilipino-Laban- Cebu City Chapter didto sa opisina ni House Speaker Pantaleon Alvarez kagahapon.

“I am open for the mayorship,” matud ni Labella, apan iyang gitataw nga mag-agad siya sa hukom sa grupo kon kinsa kanila ni kanhi mayor Michael Rama ang moatbang kang Osmeña.

Matud ni Labella nga PDP Laban-Cebu City Chapter adunay coalition sa Barug Team Rama, ANAD Party List, ug Panaghiusa party list. Si Rama nasayod na nga si Labella nanumpa na pagka presidente sa PDP-Laban-Cebu City didto kang Alvarez.

Si Mayor Osmeña miingon nga bisan kinsa mahimong makalansar pagka mayor kay ania kita sa demokrasya nga kagamhanan. (BANAT NEWS)