Police station sa Toledo gibiyaan sa mga polis

CEBU, Philippines — Paimbestigahan sa PNP Provincial Investigation Detection and Management Group ang kapolisan sa Toledo human nga nasakpan atol sa surprise inspection kaniadtong Domingo sa buntag nga gibiyaan ang ilang police station.

Si Provincial Director Edgar Alan Okubo mao mismo ang nakasakop nga gibiyaan sa mga polis ang Toledo City Police Station ug gikandadohan lang ang pultahan.

Matud ni Supt. Melbert Glade Esguerra, deputy provincial director for operation, nga hayan pangrelibohan ang maong mga polis nga naka-duty unta sa maong higayon. Gisuportahan ni Regional Police Director Jose Mario Espino ang posibleng pagrelibo sa tanang mga polis sa Toledo nga gipangulohan ni Supt. Anthony Bagarinao.

Matud ni Espino nga karong dagko na og sweldo ang mga polis dili na unta sila magtinapolan. Tungod sa ilang gihimo, hayan masuspenso sila og pipila ka adlaw.

Mga 18 unta ka polis ang duty atol sa maong higayon, apan silang tanan, wala didto sa police station, apil ang radio operator ug jailer.

Si SPO4 Henry Acosta nga maoy senior executive officer sa Toledo Police Station, giparelibohan dayon kay siya unta ang modumala sa kapolisan kon wala ang hepe.

Ang hepe nga si Supt. Bagarinao wala makontak aron unta makuhaan sa iyang pamahayag. (BANAT NEWS)