Pusher sikop sa buy bust
CEBU, Philippines — Nasikop ang usa ka suspetsadong pusher og shabu sa gipahigayong buy bust operation sa kapolisan diha sa Barangay Punta Engaño, dakbayan sa Lapu-Lapu.
Ang nasikop mao si Andres Bahiyo Maluluy-on, Jr., 38-anyos, residente sa Sitio Ibabao, Barangay Mactan sa nahisgutang siyudad.
Nasakmit gikan kang Maluluy-on ang 13 ka gagmay nga paketeng shabu, drug paraphernalia ug buy bust money nga gipabayad sa poseur buyer sa suspetsado.
Matud ni PO2 Marlou Britania sa Lapu-Lapu City Police Office nga ang team gipangulohan sa ilang hepe sa LLCPO Precint 2 nga nagbase sa Barangay Mactan sa maong dakbayan Chief Inspector Wyne Magbanua.
Ang maong operasyon natigayon human ang kapolisan nakadawat og taho kabahin sa ilegal nga kalihukan sa suspetsado.
Si Britania nagkanayon nga ang maong dinakpan bag-o nga giilang pusher og shabu sa maong lugar.
Ang kapolisan mipahigayon og pagpaniid batok kang Maluluy-on ug human masuta nga nalambigit kini sa ilegal nga kalihukan gipahigayon dayon ang buy bust operation. (BANAT NEWS)
- Latest
