Flakka nakasulod na sa Sugbo
CEBU, Philippines — Ang regional director sa Philippine Drug Enforcement Agency (PDEA)-7 Emerson Margate mibutyag nga ang bag-ong klase sa druga nga “flakka” o labing naila nga “zombie drug” posibleng misulod na sa Sugbo.
Matud ni Margate nga ang flakka usa kini ka klase sa party drug nga naggikan sa Mexico diin kuyaw kaayo ang epekto niini.
Ang tawo nga mogamit sa maong matang sa druga giingong magkirig-kirig ug mamaak kini sa isig ka tawo. Ang maong klase usab sa drugas makamatay.
Subay sa kampaniya sa kapolisan ug PDEA batok sa ginadiling drugas gitutokan usab nila karon ang pagsumpo sa maong mga party drug sama sa flakka ug ecstasy nga giingong gipakatap na nganhi sa Sugbo.
Atol sa 888 forum kagahapon sa buntag diha sa Marco Polo Hotel gibutyag usab ni Margate nga ang target sa mga migama ug nagpakatap niining party drugs ang kabataan.
Gibutyag ni Margate nga hugtanon silang mag-monitor sa mga magsadya atol sa Sinulog tungod kay posibleng molihok usab niini ang mga nagpakatap og party drugs.
Matud usab ni Margate nga aduna nay duha ka dinakpan dinhi sa Sugbo nga migamit og party drugs apan wala pa masuta kong diin kini naggikan ug ang nagtuyok sa distribusyon niini sa Sugbo.
Si Margate miawhag sa kabataan nga magmabinantayon sa ilang mga lihok aron dili sila mabiktima niining mga ilegalista. (BANAT NEWS)
- Latest
