Suspek sa lugos dili sikyu

CEBU, Philippines — Dili guwardiya kun dili watchman lang o tigbantay sa simbahan ang 39-anyos nga lalaki nga gipasanginlang nilugos sa 19-anyos nga babaye kilid sa simbahan sa Sta. Teresa de Avila Parish sa Poblacion, Dakbayan sa Talisay niadtong Domingo sa kaadlawon.

Si Supt. Jason Villamater, hepe sa kapolisan sa dakbayan, nibutyag nga nagsul-ob lang sa uniporme sa guwardiya sa Flying Ace Security Agency ang suspek nga si Joseph Saurdino.

Lakip sa walay lisensiya ang iyang service firearm nga .38 revolver maong gipasakaan sab siya og kasong ilegal nga paghupot og armas gawas sa kasong pagpanglugos.

Human nasuta nga dili tinud-anay nga guwardiya si Saurdino, hayan idugang ang kasong usurpation of authority. (BANAT NEWS)