Traffic enforcer nadakpan sa buy-bust taktak na
CEBU, Philippines — Wala nay balikan nga trabaho sa Cebu City Transportation Office ang traffic enforcer nga nasikop sa buy-bust operation sa Drug Enforcement Group ug Regional Drug Enforcement Unit sa Police Regional Office-7 sa Sitio Lawis, Pasil, Siyudad sa Sugbo.
Si Joselito Cabije, 34, nakuhaan og dul-an usa ka milyon nga kantidad sa gituohang shabu sa niaging adlaw. Siya nasulod isip traffic enforcer sa CCTO niadtong Agosto 2016.
Sigon sa operations head sa CCTO, Francisco “Isko” Ouano, nga sa wala’y pagduha-duha gitaktak sa trabaho ang maong traffic enforcer ug bisan kini mohangyo dili nila dawaton.
Daan na nga gipahibawo ni Mayor Tomas Osmeña nga dili gyud niya tugutan nga dunay mga kawani sa kagamhanan sa siyudad nga malambigit sa ginadiling drugas. Nagkanayon si Ouano nga ang traffic enforcers sa siyudad mas dako og sweldo itandi sa ubang local government units tungod kay casual ang ilang posisyon ug sama sa regular employee makadawat sab sila og mga benepisyo.
Awhag ni Ouano sa iyang mga sakop nga dili sayangan ang oportunidad nga gihatag aron makatrabaho sa gobiyerno tungod kay daghan ang gusto niini apan dili mahatagan sa ingon nga kahigayunan.
Samtang si Osmeña sa iyang bahin niingon nga ang nahitabo sa maong traffic enforcer wala nagpasabot nga kinahanglan sab ipaubos sa drug test ang tanang enforcers tungod lang sa maong insidente.
“Everyone undergo drug testing. There is no need at this point to have everybody tested because one traffic enforcer has committed that violation. When you manage something you have to weigh the pros and cons of that it might be really counter-productive if you overreact to specific situation,” sigun ni Osmeña. (BANAT NEWS)
- Latest
