16-anyos naghikog

CEBU, Philippines — Usa ka 16 anyos nga consistent honor student ang naghikog didto sa pansayan sa iyang giabangang boarding house sa lungsod sa Argao niadtong Lunes sa hapon human gikatahong nasakpang nangodigo sa iyang examination.

Mihangyo sa Banat News  ang Women and Children’s Protection Desk (WCPD) sa Argao Police Station nga si SPO1 Vivian Tamayo nga dili lang panganlan ang maong batang babaye.

Matud pa nga napalgang nagbitay sa kisame ang tinun-an. Nagduda usab si Tamayo nga posibleng di ang pangodigo lang maoy rason para maghikog ang bata maong gusto nilang palawman ang imbestigasyon.

“Nasakpan siya pag Lunes sa hapon nga exam nga nangodigo pero dili ‘ta makaingon nga mao nay rason. It will be unfair for the teacher,” si Tamayo miingon.

Matud pa nga wala pakauwawi sa maestra ang bata sanglit mitug-an sab ang ubang mga tinun-an nga gisekreto ra pagkuha ang test paper sa maong bata.

Pagkahuman niadto, matud pa nga miuli ang bata sa iyang boarding house ug wala na misulod og balik sa ilang tunghaan, patay na kini dihang napalgan sa tag-iya  alas 4:30 sa hapon sa susamang adlaw. Gidala kini sa tambalanan apan gideklarar nga patay na.

“Naa na gyud syay depression it could be nga kadtong nasakpan siya kay naka-trigger lang ‘to sa iyang depression,” matud pa sa maong polis. (BANAT NEWS)