Dry run sa Traslacion ug fluvial procession gihimo

CEBU, Philippines — Hatagan unya og “Highest Military Honors” sa Naval Forces Central ang imahen sa Senior Sto. Niño ini og abot niini diha sa ilang kampo sa adlaw nga gikatakdang himuon ang Fluvial Procession karong Sabado. Samtang gipahigayon ang dry run kagahapon sa buntag sa Philippine Navy kauban ang mga stakeholders, ug kadagkuan sa Basilica Minore del Sto. Niño.

Kaadlawon kagahapon gidawat ang imahen sa tiilan sa unang tulay sa Dakbayan sa Lapu-Lapu gikan sa Dakbayan sa Mandaue, ug gidala kini sa simbahan sa Birhen sa Regla dayon sa Naval Forces Central, diin nanukad ang fluvial procession.

Matud pa ni Lt. Nomer Bilbao, sa Philippine Navy, natakdo ra sa ilang schedule ang paglawig sa dagat, hinoon aduna lay gamay nga han-ayonon aron hingpit nga mahapsay ang fluvial procession.

Sumala pa ni Bilbao, mobutang usab sila og medical personnel ngadto sa pito ka mga sakyanan sa dagat lakip ang BRP Agta nga kargahan sa mga imahen aron sa pagsiguro nga luwas ang biyahe sa mga pilgrims, aduna usab mga speed boats nga mag-abay.

Bukas ang NAVFORCEN compound sugod alas-2 sa kaadlawon alang sa mga pilgrims nga mopagikan sa imahen apan gidili gyud ang pagdala og bisan unsang bags nga dili transparent.

Giawhag usab ang mga mosakay sa barko sa navy nga kinahanglan silang mokuha og access pass alang sa seguridad. Andam na usab ang ilang pantalan  sa maong kalihokan. (BANAT NEWS)