Nurse na-depress

CEBU, Philippines — Ang bati nga serbisyo sa kan-anan ug ang depresyon maoy nakita sa uyoan sa registered nurse nga napusilan patay sa mga polis diha sa sud sa usa ka sikat nga kan-anan sud sa usa ka mall sa Tabunok, Talisay City niadtong miaging adlaw.

Ang maong registered nurse nga si Michelle Jeff Cabañero Gabutan, 32, taga Sitio Nonoc, Barangay Tabunok nakaangkon og samad pinusilan sa dughan human napusilan ni PO1 Erwin Denila nga daling miresponde sa alarma.

Si Kapitan Raul Cabañero sa Barangay Bulacao ug mao ang presidente sa Association of Barangay Council (ABC) sa Siyudad nibutyag nga sakit para nilang mga kabanay nga magtan-aw sa ilang kaliwat nga namatay.

Busa sa iyang bahin dili lang siguro sila mopasaka og kaso ngadto sa Commission on Human Rights (CHR) apan gusto lang niya maimbestigaran og independenteng ahensiya kon unsa gyud ang nahitabo kon sakto ba ang kapulisan sa ilang gihimo.

Matud pa niya nga bag-o lang nauli gikan sa nasud nga Canada ang iyang pag-umangkon kay nagtrabaho kini isip nurse. Siya nagkanayon nga magsige na gyud og kaon ang iyang pag-umangkon sa maong kan-anan.

Apan siya mibutyag nga aduna’y higayon nga gisapot ang pag-umangkon tungod kay dugay ang serbisyo sa maong kan-anan ug duna pay higayon nga dili mao ang gihatud nga pagkaong gi-order niini. Wa na hinuon siya makahinumdom kanus-a kadto nahitabo apan regular gyud nga customer si Gabutan sa maong kan-anan matud niya.

Dugang pa niya nga nadungag sa depression sa iyang pag-umangkon kadtong pagbiya sa kapuyo ug gidala ang iyang anak nga didto sa Davao City.

Gusto lang ni Cabañero nga mahibaw-an kon aduna ba’y kasaypanan ang polis sa ilang gihimo tungod kay .22 magnum revolver man ang armas sa iyang pag-umangkon kontra sa .9mm gikan sa polis nga unta mahimo pa unta kining ma-neutralize lang o matiil lang sa pagpusil.

Si Supt. Jason Villamater, pangu sa kapulisan sa dakbayan sa Talisay nipirma sa commendation nila ni PO1 Denila ug PO1 Ramonito Dinapo nga maoy nakaresponde sa alarma.

Si Villamater nibutyag nga sakto lang ang gibuhat sa iyang mga sakop tungod kay paspas man ang panghitabo.

Samtang si PO1 Denila nibutyag nga wala na gyud siya makahuna-huna sa pagpusil sa tiil sa suspek nga si Michelle Jeff Cabañero Gabutan gumikan kay pwerte ra gyud nilang duola.

Nabalaka siya nga kung tiilon pa niya hayan makahigayun pa unya hinuon og bawos ang suspek kaniya.  Si  PO1 Dinapo sa iyang bahin nibutyag gibantayan nila ang palibot kay nakadungog man siya og report nga adunay kauban ang suspek.

Matud pa ni Villamater  dunay himuong imbestigasyon apan siya nagtuo nga husto ang gihimo sa iyang mga sakop  ug nituman ra sila sa ilang trabaho.

Samtang ang tigpamaba sa Police Regional Office 7 nga si Police Supt. Reyman Tolentin mihulagway nga epektibo ang gihingusgang Beat Patrol system sa kapolisan sama sa nahitabo didto sa Talisay. “Matawag nato nga they are religiously doing their job,” paghulagway pa ni Tolentin sa nahitabo. Paimbestigaran sab nila karon kon nganong nakasulod ang maong armadong lalaki. (BANAT NEWS)