Nangatkat sa bukid gi-rescue

CEBU, Philippines — Giluwas sa kapolisan ang 11 ka lokal nga turista kinsa nag-camping sa bukid nunot sa nasinati nga dautang panahon sa Sitio Cambubuyog, Barangay Mangaco, Lungsod sa Ginatilan niadtong Sabado sa gabii.

Ang mga turista nga mga residente sa Dakbayan sa Sugbo giila nga sila si Bernadette Austria, 34, ug mga anak niini nga nag-edad og 8 ug 12-anyos, Philip Sayson, 25; Joan-al Campo, 24; Cristina Nagara, 22; Cerelle Nagara, 23; Cairra Sebial, 20, ug si Hardelene Perillo, 21-anyos.

Samtang ang bugtong nga taga Dakbayan sa Lapu-Lapu mao si Claud Robert Bering, 21-anyos.

Sumala pa sa imbestigador sa Ginatilan Police Station, PO3 Ruben Catubig, nga niadtong Sabado nihapit ang 11 ka managhigala sa ilang estasyon aron magpahibawo nga motungas sila sa bukid ug adto mag-overnight camping ug aron sab ibilin ang ilang gidala nga sakyanan.

Matud pa nga hapon na sila naabot sa bukid ug giingong nakasinati sila og grabe ka baga nga fog diin giingong zero visibility na.

Pag-abot sa alas 6 sa gabii, nibunok na ang kusog nga uwan ug kusog nga hangin nga nihayang sa pipila nila ka tent.

“Nanawag sila sa ilang amiga nga naa sa siyudad kay pwerte na man kunong kusoga sa hangin, tugnaw na kaayo. Unya naa baya sila’y kuyog nga bata. Di maantus sa mga bata ang katugnaw. Mao to nga ang ilang amiga ang nanawag sa 911 imbis nga ari motawag sa amoa,” matud ni Catubig.

Gitataw sa polis nga sa dihang nananghid ang grupo sa ilang estasyonan, gihatagan nila kini og numero aron matawagan sila niini kun magkinaunsa.

Butyag ni Catubig nga maayo ang panahon sa dihang wala pa nanukad sa bukid ang mga turista ug giingong nikalit lang kini og kabati.

“Kanang lugara man gud diha lagyo kaayong mga balay. Wala kaayo’y kahoy. Nindot gyud nuon na diha kung summer. Daghan na sad nisaka diha,” matud ni Catubig.

Gisaka sa grupo sa kapolisan sa Ginatilan inubanan sa National Disaster Risk Reduction and Management Council ug pipila ka niboluntaryo sa pagtabang.

Matud ni Catubig nga luwas ra nga nakakanaug ug nakauli ang mga turista.

“Basa kaayo sila oy pero may na lang wala ray naunsa nila,” sumala pa ni Catubig. (BANAT NEWS)