Talisay City contingent mas paninduton

CEBU, Philippines — Gilauman nga mas abtik ug paspas ang presentasyon sa sayaw sa Talisay City contingent atol sa Sinulog Grand Parade karong Domingo.

Matud ni Edgar Mabunay, city budget officer sa Talisay, nga ilang hashasan ang ilang lihok aron mas nindot pa nga tan-awon human ila naangkon ang kadaugan sa Sinulog sa Kabataan sa Lalawigan niadtong Sabado.

Ang Talisay City Central Elementary School ang nahimong best in musicality, ikaduha sa street dancing competition, best in costume ug mao ang nakadaug sa ritual showdown. Sa kinatibuk-an nakatigum sila og P490 mil nga ganti.

Samtang ang officer-in-charge sa Cebu City Police Office, Senior Supt. Angeles Geñorga, nipadayag nga malinawon ang duha ka adlaw’ng Sinulog sa Kabataan sa Lalawigan ug sa Sinulog sa Barangay niadtong Sabado ug Domingo.

Apan matud niya nga wala kini nagpasabot nga wala nay angayang bag-uhon sa seguridad alang sa Sinulog. (Gabriel C. Bonjoc ug Camille L. Pateres/GMR)

Way kalingawan sa Mandaue sa Sinulog

Nagdumili sa pagluwat og permit si Mandaue City Mayor Gabriel Luis “Luigi” Quisumbing sa mga grupo nga buot mopasiugda og kalingawan karong Domingo atol sa Sinulog sa Dakbayan sa Sugbo.

Matud ni Quisumbing nga ang bugtong grupo nga ilang nahatagan og permit mao ang mopasiugda sa life dance nga pagahimoon sa reclamation area.

Gipasabot ni Quisumbing ang hinungdan sa iyang pagdumili paghatag og permit mao nga ang mga grupo nga nagtinguha sa pagpasiugda og kalihukan human sa Sinulog Festival ulahi na nga niduso sa mga dokumento.

Naglakip sa mga gikinahanglan nga rekisito mao ang traffic plan sa paghatag og panahon alang sa paghimo og mga pamaagi sa  Traffic Enforcement Agency of Mandaue (TEAM) ug environmental plan alang sa City Environment and Natural Resources Office (PENRO) sa tukmang paghipos sa basura.

Dugang gikinahanglan ang security plan alang sa kapolisan nga maoy mohatag og seguridad ug sa mga tawo nga motambong sa kalihukan. (BANAT NEWS)