Way rerouting sa traslacion sa Mandaue

CEBU, Philippines — Dili mopatuman og rerouting sa mga sakyanan ang Traffic Enforcement Agency of Mandaue (TEAM) sa nagkadaiyang dalan sa dakbayan atol sa traslacion karong Biyernes.

Gipahibawo ni Glenn Antigua, pangulo sa TEAM, nga ang mga dalan nga maapektohan mao ang A.S. Fortuna sa Banilad, ug Highway Seno ug A. del Rosario nga mosumpay na sa Sotero Cabahug Extension.

Hinuon si Antigua niingon nga malangan lang gyud ang biyahe sa molabay nga mga sakyanan sa maong lugar tungod kay mahunong man ang ilang pagdagan sa higayon nga molabay na ang karo nga luwanan sa imahen sa Señor Sto. Niño ug Birhen sa Guadalupe paingon sa National Shrine of Saint Joseph.

Matud ni Antigua nga sirado ang dalan S.B. Cabahug Extension sa atubangan sa simbahan tungod kay magsugwak man ang mga deboto.

Maapektuhan sab ang kadalanan sa dakbayan nunot sa street dancing sa mga contingents nga mosalmot sa Panagtagbo Festival.

Ang Panagtagbo Festival ug Sagrada Familia maoy nalakip sa mga kalihukan sa dakbayan karong Biyernes.

Si Gwen Tianero sa Taga Mandaue, Inc. (TMI) nipahibawo nga ang Panagtagbo Festival karong tuiga apilan sa walo ka contingents.

Buksan ang kalihukan pinaagi sa street dancing nga manukad sa mga dalan sa A. del Rosario, Sotero Cabahug ug Catalino C. Ouano paingon sa Barangay Centro.

Ang mananaug makadawat og P50,000 sa unang ganti, P30,000 sa ikaduha ug P20,000 sa ikatulong ganti.

Matud ni Broz Bullosos sa TMI nga ang pagladlad sa mga karaang imahen sa Sagrada Familia ang lakip sa kalihukan nga ipahimutang sa Parkmall. (BANAT NEWS)