Kadaugan sa Apas-BMO wa katarug kang Tomas
CEBU, Philippines — Bisan nigawas nga champion sa Sinulog sa Kabataan sa Barangay ang Apas-BMO contingent apan wala nausab ang baruganan ni Cebu City Mayor Tomas Osmeña sa pagtaktak sa usa sa mga staff sa Barangay Mayor’s Office (BMO) sa Barangay Apas.
Gitaktak sa trabaho si Renato Jardaleza nga giingong nalambigit sa illegal solicitation sa mga business establishments sa barangay. Ang mayor nisugyot hinoon nga kun dunay kwarta ang maong contingent i-refund ang tanang donors.
Nidugang ang mayor nga kun si Apas Barangay Kapitan Ramil Ayuman mopasaka og kasong graft and corruption iya kining tabangan.
Butang nga wala nauyoni ni Osmeña mao ang giingong paghulga sa mga dili mohatag og donasyon nga maapektuhan ang ilang patigayon.
Samtang si Rey Suelto, contingent head, niingon nga andam sila motuman sa rekomendasyon sa mayor.
Matud niya nga sa ilang solicitation, P8,000 ang natigum apan P500 lang ang gikan sa business establishment.
Si Ayuman sa iyang bahin mapasalamaton kang Osmeña nga bisan sa ilang bangi sa politika andam kini motabang kaniya.
Human na sa Sinulog mosang-at og reklamo si Ayuman aron dili mabalda ang contingent sa Apas. (BANAT NEWS)
- Latest
