Tribu katbalaugan nanganti sa kadaugan
Praktis dayon ang gihimo sa Tribu Katbalaugan sa ilang pag-abot sa Sugbo niadtong Domingo aron maanad sila sa lugar diin ipahigayon ang ritual showdown sa Sinulog 2018 karong Domingo.—Aldo Nelbert Banaynal/GMR
CEBU, Philippines — Sa ika-upat nga higayon mopasundayag na sab ang Tribu Katbalaugan Samar atol sa Sinulog Grand Parade.
Ang contingent gikan sa Samar nangabot na niadtong Domingo sa buntag ug kagahapon sa hapon nagsugod sa ilang blocking.
Sama sa niaging katuigan, gipili gihapon sa contingent nga motutok sa pagpanalipod sa kinaiyahan ang ilang konsepto.
“Karon ang among story gyud is about a future city, murag naay balance sa environmental protection unya progresibo sila unya naa gihapon ang pagtuo ni Señor Sto. Niño,” matud ni Ador Hurtado ang contingent coordinator ug tourism officer sa Samar.
Matud ni Hurtado nga apil sa ilang storyline ang kalabot sa usa sa mga estorya sa ilang lugar nga nahimong ilado na nga “The Lost City of Samar”.
Ang contingent adunay 97 ka dancers nga magsilbing “future tawo (sa Samar) nga warriors” matud ni Hurtado.
Gawas sa mga dancers, 250 sab ka propsmen ang maong contingent ug 50 ka instrumentalists.
Moabot sa P3 milyones ang gasto sa lokal nga kagamhanan sa pag-apil sa Sinulog karong tuiga.
Niadtong tuig 2015 unang niapil ang Tribu Katbalaugan sa Sinulog diin nakuha nila ang ikaupat nga dapit, ikaduha sa 2016 ug sa 2017 sila ang nidaug sa street dancing.
Karong tuiga, matud ni Hurtado nga tinguha nila nga madepensahan nila ang ilang titulo isip best in street dancing ug madaug na ang grand prize sa ritual showdown. (BANAT NEWS)
- Latest
