Pag-umangkon sa mayor na-drug bust
CEBU, Philippines — Pag-umangkon og mayor kauban ang amigo niini nasikop sa buy bust operation didto sa Sitio Tangasan Barangay Valladolid, Dakbayan sa Carcar niadtong Biyernes sa alas 4:40 sa hapon.
Ang mga dinakpan mao sila si Rolly Barrido, 30, ug si Bimbo Apura, 33, nagpuyo sa nahisgutang lugar. Si Apura giingong pag-umangkon sa mayor sa maong siyudad.
Matud pa ni Supt. Gregorio Galsim lima ka pakete sa shabu ang nakuha gikan sa duha.
Si Apura niangkon nga iyang pag-umangkon si Bimbo apan wala niya kini tabontaboni kay siya pa gani ang nihatag og impormasyon sa kapulisan bahin sa maong ilegal nga kalihukan niini.
Samtang usa ka traffic enforcer sa Cebu City Transportation Office sa Cebu City ang nadakpan kauban iyang kauban sa buy bust operation nga nahitabo sud sa usa ka pension house sa may Imus Road, sa Dakbayan sa Sugbo kagahapon sa udto.
Ang maong traffic enforcer giila nga si Joselito Cabije alyas Magu, residente sa Sitio Lawis, Barangay Pasil ug usa sa mga nasunogan og balay.
Samtang iyang kaubang nadakpan si Ronnie Sabanal ug residente sa F. Rallos St., Barangay Pasil, Dakbayan sa Sugbo.
Gipahigayon ang maong operasyon sa Philippine National Police Drug Enforcement Group (PNP DEG-7) inabagan sa Regional Special Operations Group (RSOG) sa Police Regional Office 7.
Nakuha gikan sa duha ang tulo ka dagkong pakete sa gituohang shabu nga motimbang na og 75 ka gramo diin mobalor na og P885 mil, timbangan, mga ID ug cellphones.
Sigun pa sa hepe sa DEG-7 nga si Police Supt. Glenn Mayam sa pension houses sagad magbase ang mga suspek. Giingong idlas ang duha kay kaduha na sila gibalibaran niini apan adtong Domingo nasulod gyud sila sa laang.
Sa pikas bahin, manag-agaw nga giingong nagpuyo-puyo nadakpan tungod sa drugas diha sa Sitio Laray, Barangay San Roque, dakbayan sa Talisay.
Ang nasikop mao sila si Ariel Abapo Numeran alyas Baks, 37 , ug si Rachell Abapo, 26. Si SPO1 Achiles Cabando sa Talisay City Police Station nagkanayon nga drug surrenderer si Numeran apan nibalik sa pagnegosyo og drugas.
Tulo ka medium nga pakete sa shabu ug usa ka gamay nga pakete ang nakuha gikan nila. Si Numeran nihimakak sa pasangil apan ang iyang kapuyo niangkon nga namaligya sila og ilegal nga drugas. — Gabriel Bonjoc
- Latest