Nurse napusilan patay

CEBU, Philippines — Usa ka registered nurse ang patay human napusilan sa mga polis sa Siyudad sa Talisay diha sa Mang Inasal sud sa usa ka mall sa Barangay Tabunok, dakbayan sa Talisay kagahapon sa hapon.

Ang namatay mao si Michelle Jeff Cabañero Gabutan, 32, taga Sitio Nonoc, Barangay Tabunok sa nahisgutang siyudad. Si Gabutan usa ka registered nurse.

Si PO2 Erwin Denila miingon nga kuyog niya ang iyang buddy nga si PO2 Ramonito Dinapo ug nanulod sila sa maong kan-anan aron mopalit og pagkaon.

Kalit lang nila nadungog ang masipang buto ug nagdinaganay na ang mga tawo. Asoy pa ni Denila nga niuban lang usab sila sa mga tawo nga nanggawas aron makita kinsa ang tawo nga nagpabuto.

Siya nagkanayon nga iyang gituyok sa pikas nga agianan apan nibalik ra pud sa lugar nga gisudlan sa suspek hangtud nga nibalik gyud kini.

Matud pa ni Denila nga nakaandam na ang ilang armas niadtong tungura sa dihang nigawas ang suspek nga pwerteng sigaha og mata, ilaha kining gisita apan giingong gitapi niini ang iyang kamot dungan sa pagtion sa gidala niining armas hinungdan nga iya usab kini nga gitapi ang kamot sa suspek ug gipusil makausa ka higayon nga naigo sa iyang dughan.

Gideritso niya og punit ang armas sa suspek tungod kay sa dihang nahagba kini nisuway pa kini og kupot sa iyang armas, matud niya iyaha pang nasultihan ang suspek nga nangayo siya pasaylo kay nagtuman ra siya sa iyang trabaho.

Si PO2 James Cabrillos, imbestigador sa Talisay City Police niingon nga ilang nakuha ang mga ID sa suspek ingon man ang .22 Magnum Deringer revolver nga adunay upat ka bala ug usa ka basiyo niini.

Siya nagkanayon nga ang puntariya sa suspek mao ang manager sa maong kan-anan nga si Charity Cardiente nga usa pa ka mabdos.

Apan si Cardiente nitug-an sa kapulisan nga wala siya kaila sa suspek ug wala usab siya masayod kon unsa iyang sala ngadto sa napatay.

Mitug-an kini sa mga polis nga human nga nagpabuto sa iyang armas ang suspek nagpunay siya (Cardiente) pagpakilooy sa suspek para lang dili sila pusilon, si Cardiente nasamdan sa luyo sa iyang walang lukon-lukon gumikan sa splinter.

Base sa kuha sa CCTV camera gikan kang Senior Police Officer 4 Frederick Larrobis, nisulod ang suspek sa maong kan-anan ug niagi pa kini sa polis nga padung usab mokaon sa maong kan-anan.

Matud pa nga nideretso kini pagsulod sa washing area nga nagbitbit sa iyang armas. Giingong pagsud niini didto nagpabuto kini sa gidala nga .22 Magnum Deringer hinungdan naalibwag ang mga kustomer.

Dali nga gidala sa tambalanan ang suspek apan gideklarar usab kining patay.

Si Supt Jason Villamater, hepe sa Talisay City Police Station nitug-an nga mohimo sila og lawom nga imbestigasyon ilabi na sa kalugak sa seguridad sa mall. — Rowena D. Capistrano (BANAT NEWS)