Dancers sa Pasil nasukod

CEBU, Philippines — Nasukod  ang pagtuo ug pagsalig sa mga dancers sa Tribu Mahugyawong-Pasil ngadto sa Balaang Bata human usa ka dakong sunog ang miigo sa ilang barangay sa oras gyud sa ilang paghalad og sayaw diha sa Cebu City Sports Center atol sa Sinulog sa Kabataan sa Barangay.

Ang mga mananayaw, propsmen ug uban pa nga sakop sa ilang grupo nasayod sa nahitabo ug gani ang uban nilang dancers ug propsmen miuli tungod kay nabalaka sa ilang mga pamilya.

Daghan ang nagtuo nga dili makaapil ang grupo human gianunsyo ni Cebu City Mayor Tomas Osmeña nga mahimong dili sila moapil tungod sa nahitabo apan  tugotan gihapon sila nga makaapil sa Sinulog Grand Parade.

Apan nahugyaw ang mga tawo human gipahibawo nga ang contingent No. 16 nga mao ang Tribu Mahugyawong-Pasil mosayaw gihapon.

Ang tema sa ilang presentasyon mao ang pagpangga sa mga kahayupan nga nakaani og masipang pakpak gikan sa sinugdanan hangtod nga nahuman ang ilang pasundayag.

Si Roy Punla, walo ka tuig na nga choreographer sa Tribu Mahugyawong-Pasil miasoy sa wala pa ang ilang pagsayaw naproblema na sila gumikan sa nahitabong sunog tungod kay katunga sa ilang mga dancers ingon man propsmen nanguli tungod sa ilang pamilya.

Ang Tribu Mahugyawong-Pasil dunay 92 ka dancers ug 135 ka propsmen.

Nunot sa maong hitabo, diha-diha dayon naghimo sila og adjustment sa ilang  props ug dancers.

Sigon ni Punla, wala sila magdahom nga sa ilang pagsayaw pakpakan sila og maayo sa katawhan dungan sa pag-ingon ang ilang kaguol ug kahuot sa dughan ilang gipagawas pinaagi sa pagsayaw isip halad sa Balaang Bata.

"Naguol mi pag-first basin bati ang performance di mi pakpakan maguba among gipangandaman, karon kay happy kay mi kay pag-perform namo wala mi mag-expect ingon ato diay ka applauded among sayaw," asoy ni Punla kinsa atol ning pagsuwat sa balita wala pa masayod kon may balay pa siyang kaulian.

Usa sa mga dancer nga si Jack Raven Reyes, 16- anyos mihilak tungod kay lakip ang ilang panimalay sa naugdaw. "Nalipay nga dala sakit, gusto ko makahalad," sigon ni Reyes.

Laing dancer sab sa maong Tribu nga biktima sa sunog mao si Jasper Cabido,19, miingon misayaw siya alang kang Sr. Sto. Niño.

Si Konsehal Dave Tumulak, Executive Committee Chairman sa Sinulog 2018 way laing nalitok kondili ang pagdayeg ug pagsaludo sa mga dancers sa Pasil sa pagpakita nila sa lig-ong pagtuo kang Sr. Sto. Niño. Sabutan sab nila kon unsay mahimong ihatag nga tabang dili lang sa mga participants sa Pasil apan lakip sa production team sa Sinulog kay sagad sa mga sakop sa Production Team taga Barangay Pasil ug nasunog ang mga balay. (BANAT NEWS)