Nagduwa og posporo hinungdan sa sunog
CEBU, Philippines — Gituohang mga bata nga nagduwa og posporo maoy hinungdan sa pagkaugdaw sa usa ka panimalay sa may Sitio Kamanggahan, Barangay Pulangbato, Dakbayan sa Sugbo niadtong Biyernes sa hapon.
Nadawat sa kabomberohan ang alarma sa maong sunog alas 2:19 sa hapon ug nakontrolar alas 2:32 diin giisa nila ngadto sa first alarm ang maong sunog.
Matud ni Senior Fire Officer 2 Ramon Molina sa command center sa Cebu City Fire Station nga gituohan sa ilang imbestigador nga mga bata nga nagduwa-duwa og posporo maoy hinungdan sa sunog nga niulbo.
Sumala pa ni Molina nga ang balay nga naugdaw gipanag-iya ni Nestor Malansay nga nagbilin og danyos nga P7,500 tungod kay ginama lang kini sa light materials.
Ang tag-iya sa panimalay ipatawag pa sa Bureau of Fire Protection aron pakisayran pa sa dugang mga detalye may kalabutan sa nahitabo nga sunog.
Wala’y nakalas sa maong sunog apan usa ka Jefferson Borbajo ang nakaangkon og garas sa iyang kalawasan atol sa pag-ulbo sa sunog hinoon wala ra nakaamong sa laing mga panimalay ang maong sunog. (BANAT NEWS)
- Latest