Talisay gihapon ang midaog

CEBU, Philippines — Sa ikaduhang sagunson nga higayon nasungkit sa Talisay City Elementary School ang “ritual showdown” sa Sinulog sa Kabataan sa Lalawigan karong tuiga nga gihimo kagahapon diha sa Cebu City Sports Center.

Gawas nga ang TCES maoy mananaug sa ritual showdown nga aduna’y ganti nga P350 mil nakuha usab nila ang best in musicality nga adunay ganti nga P50 mil; ikaduha sa street dancing nga adunay ganti P40 mil ug sa best in costume nga P50 mil.

Nahimong "unanimous" ang desisyon sa  mga judges sa Sinulog sa Kabataan sa Lalawigan sa  pagpili sa Talisay isip kampeyon.

"They have clear concept of the performance. Though they have a lot of props they were able to manage it," matud ni Rodeo Fronda, Presidente sa  Folk Dance Society of the Philippines kinsa maoy chairman of the board of judges.

Nakita usab sa mga judges  ang improvement sa performance o pagsayaw sa mga contingents nga nisalmot   karong tuiga nga kompetisyon. Hinuon matod nila nga aduna pay angay gihapon palamboon sama sa props.

Matud ni Rudy  Reveche ang usa sa mga judges nga usahay dili na makita ang mga mananayaw tungod sa kadaghan sa props nga maoy gipalihok.

Gitataw sa mga judges nga na-improve ang presentasyon sa mga contingents karong tuiga kon itandi sa milabay nga katuigan ug nihagit sa mga choreographers nga ayohon pa ang presentasyon hilabina ang moapil sa Sinulog Grand Parade.

Sa resulta sa mga mananaog sa Sinulog sa Kabataan sa Lalawigan karong tuiga, ikaduha sa ritual showdown mao ang Carcar City Division, 3rd place ang  City of Bogo Science and Arts  Academy, 4th place ang Municipality of Tuburan ug 5th place ang Tribu Ginatilan, Municipality of Ginatilan.

Sa Best in Musicality award nagsunod sa Talisay ang Carcar City Division nga nakadawat og cash prize nga P30,000; 3rd ang City of Bogo Science and Arts Academy nga P20,000 ang nadawat; 4th place ang Municipality of Tuburan nga nakadawat usab og cash prize nga P15,000 ug ikalima ang Tribu Hinatdan-Palanas, Ginatilan, Cebu nga nakadawat og P10,000.

Sa best in Street Dancing award,  nasungkit sa Municipality of Tuburan ang first prize nga P50,000. Ikaduha ang Talisay City Central Elementary School (P30,000),  3rd place ang Carcar City Division (P20,000).

Si Marvi Caño, choreographer sa TCES nibutyag nakasinati sila og kalisod sa dihang ilang giusa ang elementary ug ang high school ingon man ang paghimo sa mga props.

Naputol ang pagsalmot sa TCES sa Sinulog niadtong panahon ni kanhi mayor Johny delos Reyes ug sa ilang pagbalik karong tuiga nagkampeyon gihapon sila. Iyang gipadayag nga ang kwarta sa gobiyerno dugay palutson busa sila naningkamot nga makautang para lang makahimo og props.

Ang siyudad ang nigahin og budget nga P6.7 milyones nga mismong si Mayor Eduardo Gullas gidak-an ug plano niyang paubsan sa sunod nga tuig.

Asoy pa ni Caño nga cacao ang ilang tema kay ang pamilyang Gullas tablea man ang negosyo hangtud nga naabot ang mga investor nga nibubo og puhonan.

Sa pangutana kon aduna pa ba sila’y kausaban sa ilang presentasyon sa Sinulog Grand Parade sunod semana, si Marvin nipadayag nga mao kana ang atangan sa kadaghanan. — Gabriel Bonjoc (BANAT NEWS)