Kasungian sa Talisay hospital, kapolisan padayon

CEBU, Philippines — Hangtud karon wala pa gyud masulbad ang kasungian sa kapolisan sa Siyudad sa Talisay ug sa Talisay City District Hospital. Kini human si Supt. Jason Villamater, hepe sa kapolisan sa siyudad, nihulagway nga daw nagpapolis-polis ang TCDH niadtong niaging tuig.

Una niini, usa ka tawo ang nalandig sa TCDH nga aduna’y samad pinusilan ug wala gyud kini ma-report sa kapolisan apan naabot sa ulohan nilang buhatan human ang Department of Health (DOH) maoy ni-report sa stray bullet incident base sab sa report gikan sa hospital. Dihang niresponde ang kapolisan, giingong dili sila hatagan og impormasyon sa mga tinugyanan sa rason nga adunay “Patient Confidentiality Act”.

Sa ilang pakisusi ug sa dagan sa ilang imbestigasyon, nasuta nga naunay sa armas ang maong lalaki hinungdan nga ila kining napasakaan og kaso.

Gipakig-estoryahan na niya si retiradong heneral Cecil Ezra Sandalo, consultant on police matter ni Mayor Eduardo Gullas, aron sila magka-dialogue sa kadagkuan sa TCDH. (BANAT NEWS)