Walo ka holding sa CICL ibutang sa probinsiya

CEBU, Philippines — Walo ka container vans ang ibutang sa Kapitolyo ngadto sa kalungsuran ug mga dakbayan sa Probinsiya sa Sugbo isip holding area alang sa Children in Conflict with the Law (CICL) o kadtong mga bata nga makasala o makalapas sa balaud.

Matud ni Marivic Garces, pangulo sa Provincial Social Welfare and Development Office (PSWDO), nga matag distrito adunay usa ka container van nga ayuhon sa Kapitolyo gawas lang sa ikalimang distrito nga duha ang ibutang diin ang usa adto sa Isla sa Camotes.

Ang Dakbayan sa Toledo ug Naga maoy duha sa mga lugar nga napilian diin ibutang ang mga container vans. Ang maong mga vans gigahinan kini og P4.5 milyones o tag P562 mil matag usa.

Matud ni Garces nga 20-footer ang maong container van diin sa sulod niini butangan og kwarto, pansayan ug opisina. Samtang ang local government units nga hingtungdan mao na ang mobutang og lamesa ug higdaanan alang sa bata nga i-hold una samtang maghuwat nga matawagan ang ginikanan o ang kabalhinan nga center. (BANAT NEWS)